జై జై నాయకా

చంద్రబాబు తృటిలో జైలు తప్పించుకున్నారు

2012-02-24T09:38:00.001+05:30

" చంద్రబాబు తృటిలో జైలు తప్పించుకున్నారు , అక్రమాలు చేసిన తెలుగుదేశం ప్రభుత్వంలోని కొంతమంది జైలుకు వెళ్లారు." అని ముఖ్యమంత్రి కిరణ్‌కుమార్ ఘాటైన వ్యాఖ్యలు చేశారు. గచ్చిబౌలి పాపం కూడా చంద్రబాబుదేనని ఆయన దుయ్యబట్టారు . గురువారం శాసనసభలో గవర్నర్ ప్రసంగానికి ధన్యవాదాలు తెలిపే చర్చలో ఆయన మాట్లాడుతూ చంద్రబాబుకు కాంగ్రెస్‌ను విమర్శించే హక్కు లేదన్నారు. చంద్ర బాబుకి మతిమరుపు పెరిగిపోయిందన్నారు. ఆయన మంత్రివర్గంలోని ఒక మంత్రి జైలుకు వెళ్లగా, చంద్రబాబు తృటిలో తప్పించుకున్నారని విమర్శించారు. ఏది మాట్లాడినా చంద్రబాబు గుమ్మడికాయ దొంగలా భుజాలు తడుముకొంటున్నారన్నారు. గచ్చిబౌలి స్టేడియంను నిర్మించిన చంద్రబాబు ఎన్నికల ఫలితాలు రావడానికి ముందుగా ఒకరికి 30 ఏళ్లకు లీజుకు ఇచ్చేశారని గుర్తుచేశారు. అయితే తాము మాత్రం 220 కోట్లతో క్రీడలను అభివృద్ధి చేస్తున్నామన్నారు. అవినీతిపై వాస్తవాలు చెబితే వినే ఓపిక చంద్రబాబుకు లేదని ఆరోపించారు. ‘రాష్ట్ర ప్రజలు తెలివైన వారు కాబట్టి తెలుగుదేశం పార్టీని ప్రతిపక్షంలో కూర్చోబెట్టారు, మాది రైతు ప్రభుత్వం, రైతుల ఆత్మస్ధైర్యాన్ని దెబ్బతీసే విధంగా వ్యవహరించకండి, రైతులు నిరాశా, నిస్పృహలకు లోనయ్యేట్టు మాట్లాడవద్దు’ అని చంద్రబాబుకు ముఖ్యమంత్రి సూచించారు.
‘అధికారంలో ఉన్నపుడు తాను ఒక సిఇఓని చంద్రబాబు చెప్పుకున్నారు, రైతుల ప్రతినిధిగా, రైతు ప్రభుత్వంగా ఏనాడూ చెప్పలేదు, ఇప్పుడేమో రైతుల గురించి మాట్లాడుతున్నారు, పోరుబాట చేస్తున్నారు’ అని ఎద్దేవా చేశారు. మాది మాటలు చెప్పే ప్రభుత్వం కాదు, చేతల ప్రభుత్వం, ఉచిత విద్యుత్ వల్ల వైర్లపై బట్టలు ఆరేసుకోవచ్చునని తొమ్మిదేళ్ళ పాటు ఎగతాళి చేసిన చంద్రబాబు ఇప్పుడు రంగుమార్చి తానూ ఉచిత విద్యుత్‌కు సిద్ధమేనంటున్నారన్నారు. ఎన్టీ రామారావు బతికుంటే చంద్రబాబు నిజ జీవితంలో పెద్ద నటుడు’ అని బిరుదిచ్చేవారని ఆరోపించారు.
కాగా గవర్నర్ ప్రసంగానికి ధన్యవాదాలు తెలిపే చర్చలో అడుగడుగునా వివాదాలే చోటుచేసుకున్నాయి. చంద్రబాబు తృటిలో జైలుకు వెళ్లేవాడన్న ముఖ్యమంత్రి వ్యాఖ్యలకు ఆగ్రహించిన తెలుగుదేశం సభ్యులు పోడియంను చుట్టుముట్టగా, ఎమ్మార్ కేసును సిఎం ప్రస్తావించిన సమయంలో కూడా పోడియం వద్దకు చేరుకున్నారు. దీంతో సభలో ఇరు పక్షాల సభ్యుల నినాదాలు, అరుపులతో దద్దరిల్లిపోయింది. తమకు న్యాయం కావాలని, స్పీకర్ తన మాట నిలబెట్టుకోవాలని తెలుగుదేశం సభ్యులు, దేశం సభ్యుల వైఖరి నశించాలంటూ కాంగ్రెస్ సభ్యులు సభలో నినాదాలు చేశారు. ఇదే సమయంలో చంద్రబాబు 2020 విజన్‌ను ప్రస్తావిస్తూ 2020... 420 అంటూ కాంగ్రెస్ సభ్యులు నినాదాలు చేశారు. అలాగే గచ్చిబౌలి స్టేడియంపై ముఖ్యమంత్రి స్పందనపై చంద్రబాబు మాట్లాడేందుకు ప్రయత్నించిన సమయంలో కూడా ఇదే పరిస్థితి నెలకొంది.

ఆరోపణలు నిజమైతే రాజకీయ సన్యాసం --మంత్రి ధర్మాన

2012-02-24T06:56:00.003+05:30

డిగ్రీ కాలేజి నుంచి అనుమతులు తీసుకునే ఆ కాలేజీ ప్రాంగణం లో తన కుమారుడి పెళ్లి జరిపించామని ,ఆ విషయాన్ని ఆధారాలతో సహా నిరూపిస్తానని మంత్రి ధర్మాన ప్రసాదరావు అన్నారు. తను పదేపదే చెబుతున్నప్పటికి తనపై రాష్ట్ర సిపిఐ నేత నారాయణ సవాల్‌కు దిగారని, ఆయన సవాల్‌ను స్వీకరిస్తున్నాని మంత్రి పేర్కొన్నారు . తాను ఆధారాలను చూప లేకపోతే మంత్రి పదవికి రాజీనామా చేయాలని ఆయన సవాల్ చేశారని, తాను ఆధారాలను చూపిస్తానని, అలాగే ఆధారాలు చూపించలేకపోతే మంత్రి పదవికే కాకుండా రాజకీయాల నుంచి శాశ్వతంగా తప్పుకుంటానని ధర్మాన ప్రకటించారు. తాను నిజాలు నిరూపించిన తర్వాత నారాయణ మాత్రం సిపిఐలో ఉండాలో లేక తర్వాత ఏమిటీ అన్న విషయాన్ని ఆ పార్టీకే వదిలేస్తున్నాని ఆయన పేర్కొన్నారు. శాసనసభ సమావేశాలు లేని దినాల్లో శ్రీకాకుళంలో ఎక్కడైనా సమయం, తేదీ, స్థలాన్ని నారాయణ సూచిస్తే అక్కడే తేల్చుకుందామని మంత్రి స్పష్టం చేశారు. తన కొడుకు పెళ్ళి విషయాన్ని రాజకీయం చేస్తున్నారని, అయినా ఆరోపణలు వచ్చినప్పుడు సరైన సమాధానాలు ఇవ్వాలని తాను ఆధారాలను చూపించినప్పటికీ తిరిగి నారాయణ ప్రతి సవాల్ చేశారని అన్నారు. డిగ్రీ కాలేజిలో విఆర్‌ఓ పరీక్షా కేంద్రాన్ని రద్దు చేయించి నా కొడుకు పెళ్ళి చేయించానని నారాయణ పదే పదే విమర్శలు చేస్తున్నారని చెప్పారు. శ్రీకాకుళంలో 22 విఆర్‌ఓ పరీక్షా కేంద్రాలు ఏర్పాటు చేశారని, పరీక్షలు జంబ్లింగ్ విధానంతో జరుగుతున్నందున అభ్యర్థికి ఏ సెంటర్‌లోనైనా పరీక్ష రాయడానికి అనుమతి ఇవ్వవచ్చునని అన్నారు. శ్రీకాకుళంలో ఉన్న అభ్యర్థులు 100 కిలో మీటర్ల దూరం వెళ్ళి పరీక్ష రాశారని మంత్రి గుర్తు చేశారు. పరీక్ష కోసం వెళుతూ మార్గమధ్యంలో రోడ్డు ప్రమాదంలో అభ్యర్థి చనిపోవడం దురదృష్టకరమని అన్నారు. జిల్లా రాజకీయాల్లో ఆటుపోట్లు ఉన్నా రాజకీయంలో ఎదుగుతూ వస్తున్నానని తెలిపారు.

జైలుకు పంపించడం ఎవరి తరమూ కాదు:బాబు

2012-02-23T18:03:00.002+05:30

తనను జైలుకు పంపించాలని కాంగ్రెస్ నాయకులు ఎప్పటినుంచో విఫలయత్నం చేస్తున్నారని తెలుగుదేశం అధినేత చంద్రబాబు నాయుడు ఆరోపించారు. తనను జైలుకు పంపించడం ఎవరి తరమూ కాదని ఆయన హెచ్చరించారు.రాష్ట్ర శాసన సభలో గురువారంనాడు జరిగిన చర్చలో తనపై వచ్చిన ఆరోపణలకు సమాధానం చెబుతూ తాము చేసిన అభివృద్ధిని చూసి కాంగ్రెస్ కుళ్లుకుంటోందని ఆయన అన్నారు. రాష్ట్రానికి కన్వెన్షన్ సెంటర్‌లు తీసుకువచ్చిన ఘనత తమదేనని వివరిస్తూ, గచ్చిబౌలి స్టేడియంను తాము నిర్మిస్తే , కాంగ్రెస్ నాయకులు ఈ ప్రతిష్ఠాత్మకమైన స్టేడియంను సమావేశాలకు వాడుకుంటూ నాశనం చేసేశారని ఆయన వివరించారు. హైదరాబాద్‌ను అభివృద్ధి చేసిన ఘనత తమకే చెందుతుందని చంద్రబాబు వివరిస్తున్నప్పుడు అధికార పక్ష సభ్యులు గొడవ చేసారు.
తమపై కాంగ్రెస్ ప్రభుత్వం 35 కేసులు సుప్రీం కోర్టులో వేసిందని, 24 విచారణ కమిషన్‌లు వేశారనీ, కానీ ఒక్కటీ రుజువు కాలేదని ఆయన వివరించారు. తొమ్మిది సంవత్సరాలు ఎటువంటి రిమార్కూ లేకుండా పనిచేశానని చెబుతూ, మా అబ్బాయి చదువుకు రామలింగరాజు డబ్బు ఇచ్చారని కాంగ్రెస్ నాయకులు ఆరోపించారు, కాని అటువంటిదేమీ లేదని స్టాన్‌ఫోర్డ్ విశ్వవిద్యాలయంవారే స్పష్టం చేసిన విషయాన్ని గుర్తు చేశారు. నేను నీతి నిజాయితీలతో ఉన్నాను. మీరు బురదలో కూరుకుపోయారు, రాష్ట్రాన్ని భ్రష్టు పట్టించారు, చేత కానివాళ్లు నన్ను విమర్శిస్తున్నారు. ప్రపంచం మొత్తం మీద తెలుగుదేశం పాలనకు గుర్తింపు వచ్చింది. ఇదే మాదిరిగా మాట్లాడితే రానున్న ఎన్నికలలో మీకు డిపాజిట్లు కూడా దక్కవని ఆయన హెచ్చరించారు.

కిరణ్‌ ,బొత్సల మధ్య ఆధిపత్య పోరు

2012-02-23T10:23:00.001+05:30

ముఖ్యమంత్రి కిరణ్‌కుమార్‌రెడ్డికి, పిసిసి అధ్యక్షుడు బొత్స సత్యనారాయణకు మధ్య ఆధిపత్య పోరు రోజు రోజుకి పెరుగుతోంది . అవకాశం లభించినపుడల్లా ఇద్దరు అధిష్ఠానానికి ఒకరిపై ఒకరు ఫిర్యాదులు చేసుకుంటున్నారు . రెండు రోజులుగా శాసనసభ లాబీల్లో ఇద్దరు నేతల అనుయాయులు కూడా తమ ప్రచార స్థాయిని పెంచారు. పిసిసి అధ్యక్షుడుగా బొత్సను తొలగించి తెలంగాణ ప్రాంతానికి చెందిన వారికి ఆ పదవిని ఇవ్వనున్నట్లు ముఖ్యమంత్రి అనుకూల వర్గం ప్రచారం చేస్తోంది . ఇందుకు ప్రతిగా అసెంబ్లీ సమావేశాల తర్వాతనో, ఉప ఎన్నికల ఫలితాలు వెలువడిన తర్వాతనో ముఖ్యమంత్రిని మార్చడం ఖాయమని బొత్స అనుకూల వర్గం ప్రచారం చేస్తోంది .
సమాచార కమిషనర్ల జాబితాలో సగం మందిని గవర్నర్ తిరస్కరించడంతో ముఖ్యమంత్రి, పిసిసి నేత మధ్య నెలకొన్న విభేదాలు భగ్గుమన్నాయి. సమాచార కమిషనర్లుగా ఎంపికైన వారి పట్ల పిసిసి అధ్యక్షుడు బొత్స మొదటి నుంచి అభ్యంతరం చెబుతున్నారు. జాబితా ఎంపికలో ముఖ్యమంత్రి, ప్రతిపక్షనేత చంద్రబాబు లాలూచీ పడ్డారన్న అభిప్రాయాన్ని తన సన్నిహితుల వద్ద బొత్స వ్యక్తం చేశారు. ఇదే విషయాన్ని ప్రధానికి, అధిష్ఠానం కు కూడా బొత్స ఫిర్యాదు చేశారు. బొత్స ఫిర్యాదు చేసాకే అధిష్ఠానం ఆదేశం మేరకు గవర్నర్ ఆ జాబితాలో సగంమంది పట్ల అభ్యంతరం వ్యక్తం చేసి ఉండవచ్చని ముఖ్యమంత్రి వర్గం భావిస్తోంది . అయితే బొత్స వర్గం మరో ప్రచారాన్ని తెరపైకి తెచ్చింది . సమాచార కమిషనర్లుగా నియమించేందుకు ప్రధానమంత్రి కార్యాలయం నుండి ఇద్దరి పేర్లు ముఖ్యమంత్రికి సూచించగా వారికి అవకాశం కల్పించలేదని, ఈ ఆగ్రహంతోనే అధిష్ఠానవర్గానికి చెప్పి జాబితాలో కోత విధించి ఉండవచ్చని బొత్స సన్నిహితులు అంటున్నారు.
అదే విధంగా ఉప ఎన్నికల అభ్యర్థుల మార్పు విషయంలోకూడా బొత్స ప్రమేయం ఉందనే అనుమానాన్ని ముఖ్యమంత్రి సన్నిహితులు వ్యక్తం చేస్తున్నారు. రకరకాల సర్వేలు చేసిన తర్వాత ఉప ఎన్నికల్లో పార్టీ అభ్యర్థుల పేర్లను ఎంపిక చేసి జాబితాను అధిష్ఠానవర్గానికి కిరణ్ పంపించారని ఆయన సన్నిహితులు చెబుతున్నారు. ఉప ఎన్నికలు జరగనున్న ఏడు స్థానాలకుగాను ఆరు స్థానాల్లో ఎదురీదే పరిస్థితి ఉందని, మహబూబ్‌నగర్ టిక్కెట్టును దివంగత ఎమ్మెల్యే రాజేశ్వర్‌రెడ్డి భార్య విజయలక్ష్మికి ఇచ్చినట్లయితే సానుభూతి ఓట్లతో కొద్దిగా గట్టెక్కే పరిస్థితి ఉంటుందని సీఎం అభిప్రాయపడినట్లు సమాచారం, అయితే అధిష్ఠానం మాత్రం ముఖ్యమంత్రి సిఫార్సు చేసిన విజయలక్ష్మికి కాకుండా ప్రకాశ్‌కు ఇచ్చింది. మహబూబ్‌నగర్ అభ్యర్థి మార్పు విషయంలో బొత్స హస్తం ఉందేమో అని ముఖ్యమంత్రి సన్నిహితులు అనుమానిస్తున్నారు. ఇప్పుడు మళ్ళీ మహబూబ్‌నగర్ టిక్కెట్టు విజయలక్ష్మికే దక్కేలా ముఖ్యమంత్రి ప్రయత్నాలు చేస్తున్నారు .
కాగా, పిసిసి కార్యవర్గాన్ని, డిసిసి అధ్యక్షుల్ని నియమించేందుకు బొత్స నిర్ణయించగా ముఖ్యమంత్రి అడ్డుకున్నారని పిసిసి నేత సన్నిహితులు చెబుతున్నారు. సగం మంది డిసిసి అధ్యక్షుల్ని ఎంపిక చేసి అధిష్ఠానవర్గం ఆమోదంతో ప్రకటించేందుకు బొత్స సిద్ధపడగా ముఖ్యమంత్రి జోక్యం చేసుకుని అధిష్ఠానంతో చెప్పి అడ్డుకున్నారని బొత్స సన్నిహితులు ఆరోపిస్తున్నారు. ముఖ్యమంత్రి, పిసిసి నేత అనుకూలురు కూడా అధిష్ఠానాని కి ఫిర్యాదులు మీద ఫిర్యాదులు చేస్తున్నారు. ముఖ్యమంత్రి పట్ల మొదటి నుంచి వ్యతిరేకతతో ఉన్న తెలంగాణ కాంగ్రెస్ ఎంపీలు కూడా అధిష్ఠానవర్గం వద్ద ఆయనకు వ్యతిరేకంగా ప్రచారం చేస్తున్నారు.
ముఖ్యమంత్రి, పిసిసి నేతల వైఖరి పట్ల రాష్ట్ర కాంగ్రెస్ వ్యవహారాల ఇంచార్జి గులాం నబీ ఆజాద్ కూడా అసంతృప్తితో ఉన్నట్లు తెలుస్తోంది .ముఖ్యమంత్రి, పిసిసి అధ్యక్షుల ఆధిపత్య పోరు కారణంగా పార్టీ ప్రతిష్ట దెబ్బ తింటోందని వీరిద్దరితో సంబంధం లేకుండా తటస్థంగా ఉండే నాయకులు ఆందోళన చెందుతున్నారు.

తెలంగాణపై తీర్మానం కోసం టీఆర్ఎస్ పట్టు,సస్పెన్షన్

2012-02-22T21:21:00.002+05:30

శాసనసభ బడ్జెట్ సమావేశాల్లో టీఆర్ఎస్ సభ్యులపై మరో మారు సస్పెన్షన్ వేటు పడింది. తెలంగాణపై తీర్మానం కోసం టీఆర్ఎస్ పట్టుపట్టింది. దీంతో సభలో గందరగోళం నెలకొంది. ఈనేపథ్యంలో మంత్రి ధర్మాన ప్రసాద రావు రెండు రోజులు సస్పెన్షన్ తీర్మానాన్ని ప్రవేశపెట్టారు. దీనిపై సభ ఆమోదం తెలపటంతో 11 మంది టీఆర్ఎస్ సభ్యులను సభ నుంచి రెండు రోజుల పాటు స్పీకర్ సస్పెండ్ చేశారు.అంతకు ముందు ఉదయం సభ ప్రారంభంకాగానే తెలంగాణపై తీర్మానాన్ని ప్రవేశపెట్టాలంటూ టీఆర్ఎస్ సభ్యులు స్పీకర్ పోడియంను చుట్టుముట్టారు. స్పీకర్ ఎంత నచ్చచెప్పినప్పటికీ సభ్యులు వినకపోవడంతో సభను అరగంట పాటు వాయిదా వేశారు. అనంతరం తిరిగి ప్రారంభమైన సభలోనూ అదే పరిస్థితి నెలకొనడంతో మంత్రి ధర్మాన ప్రసాదరావు సస్పెన్షన్ తీర్మానాన్ని ప్రవేశపెట్టారు. కాగా ఈ తీర్మానాన్ని శాసనసభ వ్యవహారాల ఇన్‌చార్జ్ శ్రీధర్‌బాబు ప్రవేశపెట్టాల్సి ఉండగా ఆయన నిరాకరించడంతో మంత్రి ధర్మాన ప్రవేశపెట్టారు. టీఆర్ఎస్ సభ్యుల సస్పెన్షన్‌కు నిరసనగా బీజేపీ, సీపీఐ పార్టీలు కూడా సభనుంచి వాకౌట్ చేశాయి.అనంతరం గవర్నర్ ప్రసంగానికి ధన్యవాద తీర్మానంపై సభలో చర్చ ప్రారంభమైంది. సస్పెన్షన్ పట్ల టీఆర్ఎస్ సభ్యులు తీవ్ర ఆగ్రహం వ్యక్తపరిచారు. ఇది ఆంధ్రప్రదేశ్ అసెంబ్లీ కాదని సీమాంధ్ర సభ అని రుజువైందని టీఆర్ఎస్ శాసనసభాపక్ష నేత ఈటెల రాజేందర్ పేర్కొన్నారు. కాంగ్రెస్, టీడీపీలకు ప్రజలే తగిన బుద్ధి చెబుతారని ఆయన అన్నారు. మమ్మల్ని సస్పెండ్ చేస్తున్నా తెలంగాణ నేతలు నోరు మెదపలేదని ఈటెల విమర్శించారు. హరీష్‌రావు, అరవింద్‌రెడ్డి, సమ్మయ్య, నల్లాల ఓదేలు, రవిందర్‌రెడ్డి, సోమారపు సత్యనారాయణ, కేటీఆర్, విద్యాసాగర్‌రావు, పోచారం శ్రీనివాస్‌రెడ్డి టీఆర్‌ఎస్ శాసనసభా పక్ష నేత ఈటెల రాజెందర్‌ తదితరులు సస్పెన్షన్ కు గురైనవారిలో ఉన్నారు.

ప్రధానమంత్రి పదవి రేసులో లేను:బాబు

2012-02-21T20:30:00.002+05:30

ప్రధానమంత్రి పదవి రేసులో తాను లేనని, జాతీయ రాజకీయాలు తమకు కొత్తకాదని టీడీపీ అధినేత చంద్రబాబునాయుడు పేర్కొన్నారు. వస్తే సీఎంగానే ముందుకు వస్తానని అన్నారు. తాను ఎప్పుడు ఎక్కడ ఉన్నా రాష్ట్ర ప్రయోజనాల కోసమే ఆలోచించానే తప్ప కొంతమంది నాయకులు మాదిరిగా లా వ్యక్తిగత స్వార్ధం కోసం పని చేయలేదని ఆయన చెప్పారు. ఎన్డీయేతో కలిసే ఆలోచనే లేదని చంద్రబాబు స్పష్టం చేశారు.మంగళవారం చంద్రబాబు మీడియాతో మాట్లాడుతూ శాసనసభను సజావుగా నడిపించే బాధ్యత స్పీకర్ నాదెండ్ల మనోహర్‌పైనే ఉందని అన్నారు. చీఫ్ విప్, 10 మంది విప్‌లను వేసుకుంటే సభ సజావుగా జరగదని ప్రభుత్వంపై ధ్వజమెత్తారు. అసెంబ్లీ సమావేశాలను చూస్తే ఆవేదన కలుగుతుందని, ప్రజా సమస్యలపై అసెంబ్లీలో చర్చ చేపట్టాలని అన్నారు. అసెంబ్లీని బుధవారం నుంచైనా సజావుగా నడిపించండి అని కోరారు. ప్రభుత్వంలో అవినీతి బయటకు వస్తే సగం మంది జైల్లోనే ఉంటారని ఆయన వ్యాఖ్యానించారు.ప్రజా సమస్యలపై చర్చిద్దామన్న సమయం దొరకడం లేదని చంద్రబాబునాయుడు పేర్కొన్నారు. సమావేశాలు జరగడం సీఎంకు ఇష్టం లేనట్లుందని ఆయన అన్నారు. ఇదే రకంగా సభను వాయిదాలు వేసుకుంటూ పోతే ప్రజల ముందు దోషులుగా నిలబడాల్సి వస్తుందని బాబు తెలిపారు. వైయస్ అన్ని వ్యవస్థలనూ భ్రష్టు పట్టించారని, మిగిలి ఉన్న అసెంబ్లీని భ్రష్టు పట్టించడానికి ముఖ్యమంత్రి కిరణ్ కుమార్ రెడ్డి ఇప్పుడు ప్రయత్నిస్తున్నారని ఆయన అన్నారు. రాష్ట్రంలోని సంపదను దోచుకోవడంపై చూపుతున్న ఉత్సాహం అసెంబ్లీని నడిపించడంలో, ప్రజాసమస్యలను పరిష్కరించడంలో చూపడం లేదని చంద్రబాబు అన్నారు. అధికారం కోసం కాంగ్రెసు నాయకులు పనిచేస్తున్నారు తప్ప ప్రజా సమస్యల పరిష్కారం కోసం పని చేయడం లేదని ఆయన విమర్శించారు.

పద్మనాభస్వామి సంపద లెక్కింపు మొదలు

2012-02-20T19:06:00.000+05:30

తిరువనంతపురం అనంతపద్మనాభస్వామి ఆలయంలో బయట పడిన సంపద లెక్కింపు సోమవారం ఉదయం ప్రారంభమయింది. సుప్రీంకోర్టు ఆదేశాల మేరకు డాక్టర్ ఎంవీ నాయర్ నేతృత్వంలో ఏర్పాటైన కమిటీ గట్టి భద్రత నడుమ లెక్కింపు ప్రక్రియను మొదలు పెట్టింది. శాస్త్రీయ పద్ధతిలో జరిపే ఈ లెక్కింపు కోసం ప్రత్యేకంగా ఎలక్ట్రానిక్ గాడ్జెట్లు ఉపయోగిస్తున్నారు. అనంత పద్మనాభ స్వామి ఆలయంలో ఐదు నేల మాళిగల్లో అంతు లేని సంపద బయటపడిన విషయం తెలిసిందే. సంపద విలువ సుమారు వంద వేల కోట్ల రూపాయల వరకు ఉండవచ్చునని అనధికారిక అంచనా, కాగా ఇదే ఆలయంలో ఆరో నేలమాళిగను తెరవాల్సి ఉంది. అయితే, దీని చుట్టూ వివాదాలు, ఊహాగానాలు చెలరేగుతున్నాయి. ఐదు నేల మాళిగల్లో బయటపడిన సంపదను లెక్కించిన తర్వాత ఆరో నేలమాళిగను తెరిచే విషయంపై సుప్రీంకోర్టు నిర్ణయాన్నివెలురించనున్నట్లు తెలియవచ్చింది. పద్మనాభుడి సంపద లెక్కింపు సందర్భం గా గట్టి భద్రతా ఏర్పాట్లు చేశారు.
సంపద డిజిటల్ డాక్యుమెంటేషన్‌లు నెలలు పట్టే అవకాశాలున్నందున ఆలయం సంప్రదాయాలకు భంగం కలగకుండా జాగ్రత్తలు తీసుకుంటున్నారు. భక్తులను ఎప్పటిలాగే దర్శనానికి అనుమతిస్తున్నారు .

ఉప ఎన్నికల్లో పోటీ చేసే అభ్యర్థులు వీరే

2012-02-19T19:35:00.002+05:30

ఉప ఎన్నికల్లో పోటీ చేసే అభ్యర్థుల పేర్లను టీఆర్ఎస్ పార్టీ ఆదివారం ప్రకటించింది. జూపల్లి కృష్ణారావు(కొల్హాపూర్) జోగు రామన్న(ఆదిలాబాద్), టి.రాజయ్య (స్టేషన్ ఘన్ పూర్), సయిద్ ఇబ్రహీం (మహబూబ్ నగర్), గంప గోవర్థన్ (కామారెడ్డి)పేర్లను ఖరారు చేసింది. వీరిలో ఇబ్నహీం మినహా మిగతావారందరూ తెలంగాణ కోసం ఎమ్మెల్యే పదవులకు రాజీనామా చేసినవారు కావడం గమనార్హం. నాగర్ కర్నూలులో నాగం జనార్దనరెడ్డిపై పోటీ పెట్టరాదని టీఆర్ఎస్ నిర్ణయించింది. ఈ ఆరు స్థానాలతో పాటు నెల్లూరు జిల్లాలోని కోవూరు స్థానానికి మార్చి 18న ఉప ఎన్నికలు జరగనున్నాయి. కోవూరు లో
వై ఎస్సార్ కాంగ్రెస్ పార్టీ అభ్యర్ధిగా నల్లపరెడ్డి ప్రసన్న కుమార్ రెడ్డి పోటీ చేస్తున్నారు,అయన పై పోటీ కి
టీ డీ పీ నేత సోమిరెడ్డి సిద్ధమవుతున్నారు. మిగిలిన చోట్ల అభ్యర్ధులను తెలుగు దేశం ఖరారు చేయాల్సివుంది. ఇక కాంగ్రెస్ అభ్యర్ధుల ఎంపిక పై ఆ పార్టీ కసరత్తు చేస్తోంది.

గులాబీతో కమలం డీ

2012-02-19T12:17:00.001+05:30

తెలంగాణలో ఉప ఎన్నికలు జరగనున్న ఆరు నియోజక వర్గాల్లో నాగర్‌కర్నూలు మినహా 5 స్థానాల్లో పోటీచేయాలని భారతీయ జనతాపార్టీ నిర్ణయించింది. ఇది ఒకరకంగా టీఆర్‌ఎస్‌కు రాజకీయంగా దెబ్బ అని చెప్పవచ్చు. శనివారం బీజేపీ రాష్ట్ర కార్యాలయంలో సీనియర్‌ నాయకులు, పదాధికారులు, ఇతర కార్యవర్గ సభ్యుల సమావేశంలో ఈ నిర్ణయం తీసుకున్నారు. నాగం జనార్దన్‌రెడ్డి ప్రత్యేక తెలంగాణ రాష్ట్ర సాధన కోసమే రాజీనామా చేసి ఏ పార్టీలోనూ చేరకపోవడంతో ఆయనకు మద్దతు ఇవ్వాలని నిర్ణయించారు. మిగిలిన వారు తెలంగాణ రాష్ట్ర సమితిలో చేరి పోటీ చేస్తున్నందున పార్టీ ఉనికిని నిలబెట్టుకోవాలంటే తాము ఈ ఉప ఎన్నికల్లో పోటీ చేయాలని బిజేపీ నిర్ణయించింది.
ఐదు స్థానాల్లో టీఆర్‌ఎస్‌ అభ్యర్ధులకు మద్దతు ఇస్తే రాజకీయంగా ఆ పార్టీ బలపడుతుందని తప్ప తెలంగాణకు ఒరిగేది ఏమీ లేదని సీనియర్‌ నాయకులు ఈ సమావేశంలో వాదించినట్లు సమాచారం. పాలమూరు జిల్లాలో నాగర్‌కర్నూల్‌ పోగా, మహబూబ్‌నగర్‌ టౌన్‌ స్థానానికి దివంగత ఎమ్మెల్యే రాజేశ్వర్‌రెడ్డి సతీమణి విజయలక్ష్మిని ఏకగ్రీవంగా గెలిపించాలని బిజేపీ ముందు నిర్ణయించినప్పటికీ ఆమె కాంగ్రెస్‌ పార్టీ టికెట్‌పై పోటీచేసే అవకాశాలు ఉన్నందున ఆస్థానం నుంచి అసెంబ్లీ నియోజకవర్గ ఇన్‌ఛార్జ్‌ కృష్ణ వర్ధన్‌రెడ్డి / మాజీ కౌన్సిల్‌ పడాకుల బాల్‌రాజులలో ఎవరో ఒకరు ఎంపికయ్యే అవకాశాలు కనిపిస్తున్నాయి. కొల్లాపూర్‌ స్థానం నుంచి నరేందర్‌రెడ్డి / శ్రీవర్ధన్‌రెడ్డిలలో ఎవరో ఒకరు ఎంపిక కావచ్చని భావిస్తున్నారు. స్టేషన్‌ ఘన్‌పూర్‌, కామారెడ్డి, ఆదిలాబాద్‌ టౌన్‌ స్థానాలకు అభ్యర్ధులను త్వరలో ఎంపిక చేయాలని నిర్ణయించినట్లు పార్టీ సీనియర్‌ నాయకులు తెలిపారు

ఇదిలా వుంటే నిన్న మొన్నటి దాకా టీఆర్ఎస్ తో సన్నిహితం గా మెలగిన నేతలకు పార్టీ నిర్ణయం మింగుడు పడటం లేదు.

బాబు లేఖ రాస్తే...ఉప ఎన్నికల్లో పోటీ చేయం

2012-02-19T11:54:00.001+05:30

తెలంగాణకు అనుకూలంగా టీడీపీ అధినేత చంద్రబాబు కేంద్రానికి లేఖ రాస్తే... తెలంగాణలోని ఆరు అసెంబ్లీ నియోజవర్గాల ఉప ఎన్నికల్లో టీఆర్ఎస్ పోటీ చేయబోదని ఆ పార్టీ ఎమ్మెల్యే కె.తారక రామా రావు ప్రకటించారు. తెలంగాణ భవన్‌లో ఆయన విలేకరులతో మాట్లాడారు. తెలంగాణవాదానికి, ఉప ఎన్ని కలకు సంబంధం లేదంటూ టీడీపీ తెలంగాణ కమిటీ ప్రచారం చేస్తోందని పేర్కొన్నారు. తెలంగాణ వాదంపైనే ఈ ఎన్నికలు జరుగుతాయని స్పష్టం చేశారు.
పార్లమెంటులో బిల్లు పెడితే తమ పార్టీకి చెందిన ఆరుగురు ఎంపీలు మద్దతిస్తారంటూ.. కేంద్రానికి లేఖ రాయాలని బాబుకు సవాల్ చేశారు. ఒకవేళ అలా లేఖ రాస్తే తాము పోటీ నుంచి తప్పుకొంటామని ప్రకటించారు. నామినేషన్ల దాఖలు వరకు వేచి చూస్తామని, ఆ లోగా స్పందించాలని టీడీపీకి సవాల్ చేశారు. ఇక టీడీపీ తెలంగాణ నేతలకు కేసీఆర్‌ను విమర్శించే హక్కు లేదన్నారు. ఒకవేళ తెలంగాణపై చర్చకు సిద్ధమని బాబు ప్రకటిస్తే... కేసీఆర్ చర్చకు వస్తారన్నారు. చర్చను ఎన్టీఆర్ భవన్‌లో చేపట్టినా ఇబ్బంది లేదని, బాబు సిద్ధమో కాదో తొలుత తేల్చుకోవాలని పేర్కొన్నారు. కాగా తెలంగాణ కోసం రాజీనామా చేసిన నాగం నియోజకవర్గమైన నాగర్ కర్నూల్‌లో ఆయన తరఫున టీఆర్ఎస్ తప్పకుండా ప్రచారం చేస్తుందన్నారు.

టీఆర్ఎస్ సభ్యుల సస్పెన్షన్

2012-02-17T19:22:00.000+05:30

అసెంబ్లీ బడ్జెట్ సమావేశాలలో శుక్రవారం 12 మంది టీఆర్ఎస్ సభ్యులపై ఒకరోజు సస్పెన్షన్ వేటు పడింది. సభలో తెలంగాణ తీర్మానాన్ని ప్రవేశపెట్టాలంటూ టీఆర్ఎస్ సభ్యులు స్పీకర్ పోడియం వద్ద నినాదాలు చేశారు. స్పీకర్ సర్దిచెప్పినప్పటికీ సభ్యులు వినిపించుకోలేదు. దీంతో మంత్రి శ్రీధర్ బాబు టీఆర్ఎస్ సభ్యులను సస్పెండ్ చేస్తూ తీర్మానాన్ని ప్రవేశపెట్టారు. తీర్మానాన్ని సభ ఆమోదించడంతో హరీష్‌రావు, విద్యాసాగర్‌రావు, వినయ్‌భాస్కర్, శ్రీనివాస్‌రెడ్డి, సోమారపు, కేటీఆర్, ఓదెల, ఈశ్వర్, రమేష్, రవీందర్‌రెడ్డి, సమ్మయ్య,అరవింద్‌రెడ్డి తదితరులను స్పీకర్ నాదెండ్ల మనోహర్ సభ నుంచి ఒక్కరోజు సస్పెండ్ చేశారు.
టీఆర్ఎస్ శాసనసభ పక్షనేత ఈటెల రాజేంద్ర మినహా మిగిలిన వారందరూ సస్పెన్షన్‌కు గురయ్యారు. మరోవైపు టీఆర్ఎస్ నేతల సస్పెన్షన్‌కు నిరసనగా బీజేపీ, సీపీఐ నేతలు సభ నుంచి వాకౌట్ చేశారు. సస్పెన్షన్ అనంతరం టీఆర్ఎస్ సభ్యులు అసెంబ్లీలోని మీడియా పాయింట్ వద్ద మాట్లాడుతూ గత మూడు రోజుల నుంచి తెలంగాణ తీర్మానాన్ని ప్రవేశపెట్టాలని సభలో ప్రభుత్వంపై ఒత్తిడి తెచ్చామని, బీఏసీ సమావేశంలోనూ ఈ ప్రస్తావన తీసుకువచ్చినా ప్రభుత్వం పట్టించుకోలేదని విమర్శించారు.
ఎన్నికల ముందు ప్రభుత్వం ఇచ్చిన హామీని అమలు చేయాలని డిమాండ్ చేస్తే మాగొంతు నొక్కి సభను నుంచి సస్పెండ్ చేశారని హరీష్‌రావు ఆగ్రహం వ్యక్తపరిచారు. సస్పెండ్ చేసే ముందు కనీసం మాట్లాడటానికి అవకాశం కూడా ఇవ్వలేదని ఆయన అన్నారు. వచ్చే ఎన్నికల్లో కాంగ్రెస్ పార్టీని తెలంగాణ ప్రజలు శాశ్వతంగా సస్పెండ్ చేయనున్నారని హరీష్‌రావు హెచ్చరించారు. తెలంగాణ తీర్మానాన్ని ఇప్పుడే ప్రవేశపెట్టాలని తాము కోరలేదని, ఈ సమావేశాలలో తీర్మానం పెడతామని హామీ ఇస్తే సభ సజావుగా జరిగేలా సహకరిస్తామని హరీష్‌రావు అన్నారు. ఓ తెలంగాణ మంత్రి తమ సస్పెన్షన్‌కు తీర్మానం ప్రవేశపెట్టినా, ఏ ఒక్క తెలంగాణ మంత్రి కూడా నిరసన వ్యక్తపరచలేదని ఆయన వ్యాఖ్యానించారు. .

"బాబుకు ముందుంది ముసళ్ల పండగ "--అంబటి

2012-02-16T20:38:00.000+05:30

"బాబుకు ముందుంది ముసళ్ల పండగ "అని వైఎస్సార్ కాంగ్రెస్ పార్టీ నాయకుడు అంబటి రాంబాబు వ్యాఖ్యానించారు. తెలుగుదేశం పార్టీ అధినేత చంద్రబాబు పై అయన నిప్పులు చెరిగారు. వైఎస్సార్ కాంగ్రెస్ పార్టీ కేంద్ర కార్యాలయంలో ఏర్పాటు చేసిన మీడియా సమావేశంలో ఆయన మాట్లాడుతూ...చంద్రబాబుపై అక్టోబర్ 17న గులాం ఆహ్మద్ బెంచ్ తీర్పునిచ్చిందన్నారు. అయితే అపుడు చంద్రబాబు ఆత్మవిశ్వాసం ఏమైందని అంబటి ప్రశ్నించారు. ఆరోజు న్యాయవ్యవస్థపై తెలుగుదేశం పార్టీ వ్యాఖ్యలు చేయలేదా అన్నారు.
దివంగత ముఖ్యమంత్రి వైఎస్‌పై, ఆయన కుటుంబ సభ్యులపై చంద్రబాబు అభ్యంతరకరమైన వ్యాఖ్యలు చేస్తున్నారని.. అంతేకాక జగన్ పెంపక విషయంపై బాబు అవాకులు, చెవాకుల పేలడాన్ని అంబటి తప్పు పట్టారు. చంద్రబాబు కుమారుడు లోకేష్ ఎంతటి ప్రయోజకుడో ప్రజలందరికి తెలుసని.. ఆయన యూనివర్సిటీ ఫీజును చంద్రబాబే కట్టాడా లేక ఎవరైనా కట్టారా అనే విషయాన్ని చంద్రబాబు వెల్లడించి... నిజాయితీని చాటుకోవాలని ఆయన డిమాండ్ చేశారు. లేకపోతే తామే ఆ గుట్టును బయటపెడుతామన్నారు. చంద్రబాబు లాంటి అవినీతిపరుడు దేశంలో లేరని రాంబాబు అన్నారు. న్యాయ నిపుణులతో చర్చించిన దరిమిలా పై కోర్టు కెళ్ళే విషయం ఆలోచిస్తామన్నారు

ఉప ముఖ్యమంత్రికి వేల కోట్ల అక్రమాస్తులు’

2012-02-16T20:28:00.003+05:30

రాష్ట్ర ఉప ముఖ్యమంత్రి దామోదర రాజనర్సింహకు మెదక్ జిల్లాలో బినామీ మద్యం వ్యాపారాలు ఉన్నాయని, లిక్కర్ వ్యవహారాల్లో ఆయన అక్రమాలకు పాల్పడ్డారని టీడీపీ సీనియర్ నేత, సినీ నటుడు బాబూ మోహన్ ఆరోపించారు . ఆయన గురువారం విలేకరులతో మాట్లాడుతూ మెదక్ జిల్లాలో అక్రమ మద్యం వ్యాపారాలు నిర్వహిస్తూ కాంట్రాక్టులన్నీ తన బావమరిదికే ఇప్పించుకున్నారన్నారు. ఇప్పటికే వేల కోట్ల అక్రమాస్తులను దామోదర కూడబెట్టారని, ఆయనపై సీబీఐ విచారణ జరిపించాలని బాబూమోహన్ డిమాండ్ చేశారు.

రాజకీయాలలో ఎక్కడా తప్పు చేయలేదు !

2012-02-16T20:01:00.002+05:30

తెలుగుదేశం పార్టీ అధ్యక్షుడు చంద్రబాబునాయుడుకు హైకోర్టులో ఊరట లభించింది. బాబు ఆస్తులపై విచారణ జరపాలని వైఎస్ విజయమ్మ వేసిన పిటిషన్‌ను గురువారం కోర్టు కొట్టివేసింది. పిటిషన్ విచారణకు అనర్హం అని కోర్టు తెలుపుతూ డిసెంబర్ 14 నాటి తీర్పు సహజ న్యాయ సూత్రాలకు విరుద్ధంగా ఉందని, ఇది ప్రజా ప్రయోజనాలకు సంబంధించిన వ్యాజ్యం కాదని హైకోర్టు తెలిపింది. చంద్రబాబు ఆస్తులపై సీబీఐ విచారణ కోరుతూ వైఎస్ విజయమ్మ అక్టోబర్ 17 న కోర్టులో పిటిషన్ దాఖలు చేసిన విషయం తెలిసిందే. ఈ తీర్పుపై చంద్రబాబు మాట్లాడుతూ రాజకీయాలలో ఎక్కడా తప్పు చేయలేదని, తప్పు చేయలేదు కాబట్టే తనను ఎవరూ ఏమీ చేయలేరని పేర్కొన్నారు. తమపై ఇప్పటి వరకు 35 కేసుల వేసినా, ఒక్కటి కూడా రుజువుకాలేదని ఆయన అన్నారు. ఈ దేశంలో ఎవరిపైనా ఇన్ని ఎంక్వైరీలు వేయలేదన్నారు. తప్పులు చేసి ఎదుటి వారిపై బురదజల్లుతున్నారని, బ్లాక్‌మెయిల్ రాజకీయాలకు పాల్పడుతున్నారని చంద్రబాబు ఆరోపించారు.తమపై అన్యాయంగా బురదజల్లాలనుకున్నారు కానీ కోర్టే వారికి తగిన విధంగా బుద్ది చెప్పిందని అన్నారు. ఆర్టీఐ కమిషనర్ల ఎంపికను వ్యతిరేకించా, అందుకే డిసెంట్ రాశానన్నారు. ఆయేషా మీరా హత్యకేసు నిందితుడుగా ఉన్న వ్యక్తి తల్లి పేరును ప్రతిపాదించారు. ఆ విషయం నాకు ముందు తెలియదు. సమాచారం తెలుసుకున్న తర్వాత వ్యతిరేకించానని బాబు తెలిపారు.
వైఎస్ఆర్ పార్టీకి విలువ లేదని, ఆనాడు తమపై వైఎస్ రాజశేఖర్‌రెడ్డి జరిపిన విచారణపై విజయకు నమ్మకం లేదని బాబు పేర్కొన్నారు. హైకోర్టు తీర్పు వైఎస్ఆర్ పార్టీకి చెంపపెట్టు అని వ్యాఖ్యానించారు. పిల్లల పెంపకంలో లోపం ఉందని వైఎస్‌కు ఆనాడే చెప్పానని, జగన్ తప్పులను విజయమ్మ ఖండించి ఉంటే ఇప్పుడు ఈ పరిస్థితి వచ్చేది కాదని చంద్రబాబు అన్నారు. కాగా హైకోర్టు తీర్పుతో టీడీఎల్పీలో నేతలు సంబరాలు చేసుకుంటున్నారు.

ఎవరు ఎవరికి చెక్ పెడతారో?

2012-02-16T13:12:00.000+05:30

సీఎం కిరణ్‌కుమార్‌రెడ్డి, పీసీసీ అధ్యక్షుడు బొత్స సత్యనారాయణలు పరస్పరం దెబ్బ తీసుకొనే వ్యూహాలకు పదును పెడుతున్నారు. బొత్స పీసీసీ పీఠానికే ఎసరుపెట్టేలా కిరణ్ ఎత్తులు వేస్తున్నట్టు కాంగ్రెస్ వర్గాల్లో జోరుగా చర్చ జరుగుతోంది! తనకు పక్కలో బల్లెంలా మారిన బొత్సకు ఎలాగోలా చెక్ పెట్టేందుకు కొంతకాలంగా విఫలయత్నాలు చేస్తూనే ఉన్నారు. మంత్రివర్గ పునర్‌వ్యవస్థీకరణకు పార్టీ అధిష్టానం అవకాశం ఇచ్చి ఉంటే, ‘ఒకరికి ఒకే పదవి’ నిబంధన సాయంతో బొత్స కు చెక్ పెట్టె వారే..అయితే ఆ ప్రయత్నం ఫలించక పోవడంతో ‘తెలంగాణ’ను ఆయుధంగా మలచుకోవాలని కిరణ్ నిర్ణయించుకున్నట్టు ప్రచారం జరుగుతోంది.
తెలంగాణా ప్రాంతానికి చెందిన తన అనుచరవర్గంతో ఆ దిశగా కొత్త ఎత్తుగడకు ఆయన తెర తీశారని చెబుతున్నారు. ఇటీవలే కేబినెట్లోకి తీసుకున్న ఉత్తమ్‌కుమార్‌రెడ్డి, మాజీ మంత్రి రాంరెడ్డి దామోదర్‌రెడ్డి, మరికొందరు ఎమ్మెల్యేలు ఈ వ్యూహంలో భాగస్వాములని సమాచారం. పీసీసీ అధ్యక్ష పదవిని తెలంగాణకే కేటాయించాలంటూ దామోదర్‌రెడ్డి, పాల్వాయి గోవర్ధన్‌రెడ్డి తదితరులు బుధవారం అసెంబ్లీ లాబీల్లో కొత్త పల్లవి విన్పించడం అందులో భాగమేనని చెబుతున్నారు. సీఎం, స్పీకర్ పదవులు రెండింటినీ సీమాంధ్రకే కట్టబెట్టడమే గాక పీసీసీ పదవినీ ఆ ప్రాంతానికే ఇచ్చి తెలంగాణకు అన్యాయం చేశారన్న వాదన వారు తాజాగా తెరపైకి తెచ్చారు. పీసీసీ, స్పీకర్ పదవులు రెండూ తెలంగాణకే ఇవ్వాలని డిమాండ్ చేస్తున్నారు. మంత్రివర్గంలో చోటు దక్కక మొదట్లో తనమీద ఒంటికాలిపై లేచిన దామోదర్‌రెడ్డిని, మున్ముందు న్యాయం చేస్తానని భరోసా ఇవ్వడం ద్వారా కిరణ్ తనవైపు తిప్పుకున్నట్టు చెబుతున్నారు. సీఎం, పీసీసీ, స్పీకర్ పదవులను సీమాంధ్రకు కేటాయించినప్పుడు, ఆ తర్వాత మౌనంగా ఉన్న నేతలు కాస్తా ఉన్నట్టుండి ఇప్పుడిలా మాట్లాడుతుండటం వ్యూహాత్మకమేనని పీసీసీ వర్గాలంటున్నాయి. పైగా సీఎం పదవి ఊసెత్తకుండా, పీసీసీ, స్పీకర్ పదవుల కోసమే డిమాండ్ చేయడమంటే బొత్సను లక్ష్యంగా చేసుకోవడమేనంటున్నారు. పీసీసీ పదవి కోసమే డిమాండ్ చేస్తే లోగుట్టు బట్టబయలవుతుందనే ఉద్దేశంతోనే స్పీకర్ స్థానాన్నీ కలిపినట్టున్నారన్న భావన వ్యక్తమవుతోంది.ఇదిలా వుంటే కిరణ్ చంద్ర బాబు లాలూచీ పడ్డారని బహిరంగ వ్యాఖ్యలు చేసి బొత్స మరో వివాదానికి తెర లేపారు.బొత్స వ్యాఖ్యలు రాజకీయ వర్గాల్లో కలకలం సృష్టించాయి.దాంతో బొత్స మాట మార్చారు.మరో వైపు చంద్ర బాబు బొత్స వ్యాఖ్యలను ఖండించారు. మొత్తం మీద ఎవరు ఎవరికి చెక్ పెడతారో ఎవరిది పై చేయి అవుతుందో మరి కొద్ది రోజులు పోతే గానీ తేలదు

కేసీఆర్ చండీయాగం

2012-02-16T09:15:00.001+05:30

టీఆర్ఎస్ అద్యక్షుడు కేసీఆర్ మరోసారి చండీయాగం చేపట్టారు. తెలంగాణ ప్రత్యేక రాష్ట్రంతోపాటు తెలంగాణ ప్రజలు సుభిక్షంగా ఉండేందుకు ఆయన ఈ యాగాన్ని నిర్వహిస్తున్నారు. హైదరాబాద్ లోని తెలంగాణ భవన్ లో గురువారం ఉదయం వేదపండితులు యాగానికి అంకురార్పణ చేశారు.
కేసీఆర్ దంపతులు, కుమార్తె కవిత, ఇతర కుటుంబ సభ్యులు ఈ కార్యక్రమంలో పాల్గొన్నారు. తెలంగాణ సాధన కోసం 2009లోనూ కేసీఆర్ ఇలాంటి యాగం నిర్వహించారు. శుక్రవారం కేసీఆర్ జన్మదినం. ఈ నేపథ్యంలో ఈ యాగాన్ని రేపు సాయంత్రం ముగించనున్నారు.

ఆర్ధిక వివాదంలో ఇలియానా

2012-02-15T19:08:00.001+05:30

హీరొయిన్ ఇలియానా ఆర్ధిక వివాదంలో ఇరుక్కుంది. ఈ గోవా సుందరి చాలా గ్యాప్ తరువాత తమిళంలో ‘నన్‌బన్’ చిత్రంలో నటించిన విషయం తెలిసిందే. ఈ సినిమాకు ముందే విక్రమ్ సరసన ఓ చిత్రంలో నటించడానికి ఇలియానా అంగీకారం తెలిపారు. భూపతిపాండ్యన్ దర్శకత్వంలో మోహన్ నటరాజన్ నిర్మించతలపెట్టిన ఆ సినిమా అనివార్య కారణాల వల్ల తెరకెక్కలేదు. అయితే ఆ సినిమాకు ఇలియానా 40 లక్షలు అడ్వాన్స్‌గా తీసుకున్నారట. తీసుకున్న మొత్తం తిరిగి ఇవ్వవలసిందిగా మోహన్ నటరాజన్ అడగ్గా... ఇచ్చేది లేదని తెగేసి చెప్పారట ఇలియానా. దాంతో ఆయన నిర్మాతల మండలిని ఆశ్రయించారు. ప్రస్తుతం ఈ వివాదంపై నిర్మాతల మండలి చర్చిస్తోంది. అడ్వాన్స్ తిరిగి చెల్లించకపోవడంతో ఇలియానాపై నిషేధం వేటుపడే అవకాశం ఉందనే అభిప్రాయం కోలీవుడ్‌లో వ్యక్తమవుతోంది.

మద్యం దుకాణాలపై బాబు అసత్యప్రచారం

2012-02-15T18:13:00.000+05:30

తనకు 31 మద్యం దుకాణాలు ఉన్నాయని టీడీపీ అధ్యక్షుడు చంద్రబాబు అసత్యప్రచారం చేస్తున్నారని పీసీసీ అధ్యక్షుడుబొత్స సత్యనారాయణ విమర్శించారు. బుధవారం ఆయన మీడియాతో మాట్లాడుతూ తమ బంధువులకు, సన్నిహితులకు కలిపి 31 మద్యం దుకాణాలు ఉన్నాయని నిజాయితీగా చెప్పానని, అంతేగానీ తమకు 31 మద్యం షాపులు ఉన్నాయని ఎప్పుడూ చెప్పలేదని స్పష్టం చేశారు. చంద్రబాబు దాన్ని వక్రీకరించి గోబెల్స్ ప్రచారం చేస్తున్నారని ఆయన అన్నారు. మద్యం సిండికేట్లలో ఉన్న తెలుగుదేశం పార్టీ నాయకులు ఎవరో చంద్రబాబుకు తెలుసునని, దాన్ని మరుగుపరిచి తమ పార్టీనే లక్ష్యంగా చేస్తూ తప్పు దోవ పట్టిస్తున్నారని బొత్స అన్నారు.
మద్యం సిండికేట్లకు సంబంధించిన ఏసీబీ నివేదిక దాచాల్సిన అవసరం ప్రభుత్వానికి లేదని పేర్కొన్నారు. ఏసీబీ నివేదికలోని సమాచారం ద్వారా మద్యం సిండికేట్లకు సంబంధించిన వాస్తవాలు బయటపడతాయని అన్నారు. మద్యం సిండికేట్లలో ఉన్న టీడీపీ నేతల పేర్లను చంద్రబాబు మూడు రోజుల్లోగా వెల్లడించాలని, లేని పక్షంలో తానే వెల్లడిస్తానని బొత్స తెలిపారు.
మద్యం సిండికేట్ల వ్యవహార కన్నా చంద్రబాబుకు మరో ముఖ్యమైన సమస్య లేదా అంటూ బొత్స ప్రశ్నించారు. రైతు, చేనేత కార్మికుల సమస్యలు, జూనియర్ డాక్టర్ల డిమాండ్ల వంటివి చంద్రబాబుకు ముఖ్యం కాకుండా పోయాయని ఆయన అన్నారు. మద్యం సిండికేట్లపై చర్చించడానికి తాము సిద్ధంగా ఉన్నామని ముఖ్యమంత్రి చెప్పారని, అయినా మద్యం సిండికేట్లపై చర్చకు పట్టుబడుతూ ప్రజా సమస్యలు చర్చకు రాకుండా చూస్తున్నారని ఆయన అన్నారు. ప్రజా సమస్యలపై చర్చ జరగాల్సిన అవసరం ఉందని, ప్రజలకు తాము జవాబుదారీగా ఉంటామని బొత్స చెప్పారు.

చెంచాలు ఎందుకు బాబూ?

2012-02-14T23:06:00.000+05:30

'భవానీ ద్వీపం విషయంలో కాంగ్రెస్ నేత చిరంజీవికి మంత్రి గంటా శ్రీనివాసరావు బినామీ అంటూ నీ చెంచాలతో మాట్లాడించడం ఎందుకు ? ఈ అంశంలో సంబంధం లేదని చెప్పేందుకు చిరంజీవి వస్తారు. కాణిపాకం వద్ద స్నానం చేసి ప్రమాణం చేస్తావా ? విజయవాడ కనకదుర్గ శక్తిపీఠం వద్ద ఒట్టు వేస్తావా చెప్పు ' అని తెలుగుదేశం పార్టీ అధినేత చంద్రబాబుకు మంత్రి సి.రామచంద్రయ్య సవాల్ విసిరారు. మంగళవారం కాంగ్రెస్ శాసనసభాపక్ష కార్యాలయంలో ఎమ్మెల్యే బండారు సత్యానందంతో కలసి ఆయన విలేకరులతో మాట్లాడారు. తాను చేస్తే సంసారం .. ఇతరులు చేస్తే ఇంకోటి అన్నట్లుగా చంద్రబాబు వ్యవహరిస్తారని రామచంద్రయ్య దుయ్య బట్టారు.బ్లడ్ బ్యాంక్ కి 2000 గజాల స్థలం మినహా చిరంజీవి ప్రభుత్వం నుంచి ఎలాంటి సహాయమూ పొందలేదన్నారు. తన హయాంలో రామానాయుడు, రాఘవేంద్రరావులకు చంద్రబాబు స్టుడియోల నిమిత్తం స్థలాలు ఇచ్చారని.. ఇప్పుడవి ఏమయ్యాయో అందరికీ తెలుసునని అన్నారు. నెక్లెస్ రోడ్‌లో దళితుల ఇళ్ల నిర్మాణం కోసం కేటాయించిన స్థలాన్ని చంద్రబాబు ఐమాక్స్ ధియేటర్‌కు ఇచ్చారని రామచంద్రయ్య పేర్కొన్నారు . దశాబ్దాల కిందట ఐమాక్స్ ధియేటర్‌కు చంద్రబాబు భూమిని మంజూరు చేస్తే అప్పట్లో తెలుగుదేశం పార్టీలో ఉంటూ .. రాజ్యసభ సభ్యత్వం వంటి ఉన్నత పదవులు పొందారే తప్ప .. దళితుల కోసం ఎందుకు మాట్లాడలేదన్న ప్రశ్నకు .. ప్రతి విషయంలోనూ నిరసన వ్యక్తం చేసి పార్టీ నుంచి బయటకు వచ్చేస్తామా అని రామచంద్రయ్య ఎదురు ప్రశ్న వేశారు. పైగా తెలుగుదేశం పార్టీలో నిరసన వ్యక్తం చేసే అవకాశం ఉందా అని ఇంకో ప్రశ్న వేశారు. ఐమాక్స్‌కు భూములు కేటాయింపులపై నాటి వైఎస్ ప్రభుత్వంపై సీఎల్పీ మాజీ నేత పి.జనార్దనరెడ్డి నిరసన వ్యక్తం చేస్తూ బస్తీవాసుల కోసం పోరాడిన సంగతిని గుర్తు చేసినప్పుడు రామచంద్రయ్య సమాధానం చెప్పలేకపోయారు. తాను అంతర్గత సమావేశాల్లో అభిప్రాయాలను వెల్లడించానే తప్ప బాహాటంగా మాట్లాడలేదని అన్నారు.

జగన్ కి సుప్రీంకోర్టులో చుక్కెదురు

2012-02-13T22:09:00.000+05:30

వైఎస్సార్ కాంగ్రెస్ పార్టీ అధ్యక్షుడు జగన్మోహన్‌రెడ్డికి సుప్రీంకోర్టులో చుక్కెదురైంది. ఆస్తుల కేసులో సీబీఐ విచారణను నిలిపివేయాలని జగతి పబ్లికేషన్స్, సండూరు పవర్ వేసిన పిటిషన్లను సోమవారం కోర్టు కొట్టివేసింది. కేసు విచారణ జరుగుతున్న సమయంలో సుప్రీంకోర్టు జోక్యం చేసుకోదని తేల్చి చెప్పింది. ఎలాంటి అక్రమాలు లేకుంటే సీబీఐ విచారణకు సహకరించాలని పిటిషన్ దారులకు సూచిస్తూ ఆ పిటిషన్లను కోర్టు కొట్టివేసింది.
సోమవారం ఒకేరోజు సుప్రీం కోర్టు ముందుకు మూడు పిటిషన్లు వచ్చాయి. ఎమ్మార్ పైన సిబిఐ విచారణ జరపాలన్న హైకోర్టు తీర్పును నిలిపి వేయాలని ఎమ్మార్ సుప్రీం కోర్టును ఆశ్రయించింది. దీనిపై ఈరోజు విచారణ జరిగింది. ఈ కేసులో ఇప్పటికే విచారణ ప్రారంభమై ఛార్జీషీట్ దాఖలు చేసినందున ఈ పరిస్థితుల్లో తాము జోక్యం చేసుకోవడం కుదరదని సుప్రీం తేల్చి చెప్పింది. అయితే ఎమ్మార్ కేసులో ఎవరి ఒత్తిళ్లకు లొంగకుండా విచారణ జరపాలని సుప్రీం కోర్టు సిబిఐని ఆదేశించింది
మరోవైపు ఎమ్మార్ కేసులో ప్రతిపక్ష నేత చంద్రబాబు నాయుడు పాత్రను విచారించాలని ప్రముఖ స్వతంత్ర సమరయోధుడు బీంరెడ్డి ఎల్లారెడ్డి వేసిన పిటిషన్‌ను కోర్టు తోసి పుచ్చింది. బాబు హయాంలో ఎమ్మార్‌లో ఎలాంటి ఉల్లంఘనలు జరగలేదని సిబిఐ ప్రతిపక్ష నేతకు క్లీన్ చిట్ ఇచ్చింది. తాము 2000 సంవత్సరం నుండి విచారణ చేస్తున్నామని తెలిపారు. సిబిఐ వాదనతో సుప్రీం సంతృప్తి చెందింది.

గవర్నర్ ప్రసంగం దారుణం

2012-02-13T22:02:00.001+05:30

గవర్నర్ నరసింహన్ ప్రసంగం దారుణంగా ఉందని, మద్యం సిండికేట్ల అవినీతిపై గవర్నర్ ఎందుకు మాట్లాడలేదని విపక్ష నేత టీడీపీ అధినేత చంద్రబాబు ప్రశ్నించారు. రాష్ట్రంలోని రైతుల ఆత్మహత్యల గురించి గవర్నర్ తన ప్రసంగంలో ప్రస్తావించలేదని, కరవు గురించి కూడా మాట్లాడలేదని ఆయన అన్నారు. శాంతిభద్రతల గురించి ఒక్క మాట కూడా లేదని చంద్రబాబు వ్యాఖ్యానించారు . సోమవారం అసెంబ్లీలో గవర్నర్ ప్రసంగంపై చంద్రబాబు మీడియాతో మాట్లాడుతూ మద్యం సిండికేట్లలో పెద్ద తిమింగలాలు ఉన్నాయని, ఆబ్కారీ మంత్రి మోపిదేవి వెంకటరమణ పది లక్షల రూపాయలు ముడుపులు తీసుకుంటే కూడా గవర్నర్ చర్యలు తీసుకోలేకపోతున్నారని ఆయన విమర్శించారు. మంత్రి, పిసిసి అధ్యక్షుడు తనవారికి 31 మద్యం దుకాణాలున్నాయని చెప్పినా కూడా గవర్నర్ ఎందుకు చర్యలు తీసుకోలేకపోతున్నారని ఆయన బొత్స సత్యనారాయణను ఉద్దేశించి అడిగారు. ప్రభుత్వం ఇచ్చిన ప్రతిని గవర్నర్ నరసింహన్ అసెంబ్లీలో గుడ్డిగా చదివారని, శాసనసభ ఆవరణ ఎమర్జెన్సీ వాతావరణంలా ఉందని, ఎమ్మెల్యేలు నేలపై కూర్చుని మాట్లాడే పరిస్థితి ఉందని చంద్రబాబు పేర్కొన్నారు. తొమ్మిదేళ్లు ముఖ్యమంత్రిగా పనిచేసిన తను ప్రెస్‌మీట్ కోసం గంటన్నర వేచి ఉండాలా అంటూ ప్రశ్నించారు.రాష్ట్రంలో అవినీతి తాండవిస్తోందని ఆయన ధ్వజమెత్తారు. చంచల్ గూడా జైలు, నాంపల్లికోర్టు, ఏసీబీ నివేదికలో మంత్రుల పేర్లు, ఐఏఎస్‌లు జైలుకెళ్లడం ఇలా గత ఏడాది అంతా చారిత్రకమైనదే అని చంద్రబాబు వ్యాఖ్యానించారు.నిత్యావసర వస్తువులు విపరీతంగా పెరిగాయన్నారు. ప్రభుత్వం కరువు నివారణచర్యలు చేపట్టలేదని, కేంద్రం నుంచి సాయం అందలేదని తెలిపారు.ఎస్సీ, ఎస్టీ సబ్‌ప్లాన్ అమలు చేయలేదని చంద్రబాబు విమర్శించారు. రాష్ట్రంలో విగ్రహాలు ధ్వంసం అవుతున్నా, ప్రభుత్వం ఈ అంశాన్ని ఖండించలేదని అన్నారు. లక్ష ఉద్యోగాలు ఎలా ఇస్తారని ప్రశ్నించారు. ఈ విషయంలో కాంగ్రెస్ ఎంపీలే సాధ్యం కాదంటున్నారని చంద్రబాబు తెలిపారు.
హౌస్ కమిటీలో తమ పార్టీ తరపున ఎవరుండాలనేది నిర్ణయించడానికి స్పీకర్‌కు ఏం అధికారం ఉందన్నారు. తమ డిమాండ్లను పట్టించుకోకపోతే ఏం చేయాలనేది పార్టీలో చర్చించి నిర్ణయం తీసుకుంటామని చంద్రబాబు స్పష్టం చేశారు.

జగన్ వర్గ ఎమ్మెల్యేలపై వేటు ఇప్పట్లో లేనట్టే

2012-02-12T09:55:00.003+05:30

జగన్ వర్గ ఎమ్మెల్యేలపై అనర్హత వేటు వ్యవహారం ఇప్పట్లో తేలే సూచనలు కన్పించడం లేదు. శాసనసభ బడ్జెట్ సమావేశాలలోగా 17మంది కాంగ్రెస్ ఎమ్మెల్యేలపై అనర్హత వేటు వేయాలని అనుకున్నప్పటికీ కొన్ని కారణాల దృష్ట్యా వాయిదా పడినట్టు సమాచారం. సోమవారం నుంచి ప్రారంభం కానున్న శాసనసభ బడ్జెట్ సమావేశాలకు జగన్ వర్గానికి చెందిన కాంగ్రెస్ ఎమ్మెల్యేలు హాజరు కానున్నారు. వైఎస్సార్ కాంగ్రెస్ పార్టీకి చెందిన కండువాలతో సభకు హాజరుకావాలని వారు నిర్ణయించారు. అలాగే తాము ప్రభుత్వానికి వ్యతిరేకంగా ఉన్నందున సభలో తమకు ప్రత్యేక స్థానాలు కేటాయించాలంటూ జగన్ వర్గానికి చెందిన ఎమ్మెల్యేలు శాసనసభ స్పీకర్ నాదెండ్ల మనోహర్‌కు లేఖ రాయాలని భావిస్తున్నారు. ఇప్పటికే ఏడు అసెంబ్లీ స్థానాలకు ఉప ఎన్నికలు జరగాల్సి ఉండగా జగన్ వర్గానికి చెందిన 17మంది ఎమ్మెల్యేలపై అనర్హత వేటు వేసినట్లయితే మొత్తం ఇరవై నాలుగు అసెంబ్లీ నియోజకవర్గాలకు ఒకేసారి ఉప ఎన్నికలు జరిగే అవకాశాలున్నాయి. ప్రస్తుత పరిస్థితిలో ఉప ఎన్నికల్లో కాంగ్రెస్ విజయం సాధించేందుకు పెద్దగా అవకాశాలు కనిపించడం లేదు. అందువల్ల ఉప ఎన్నికలకు వెళ్ళడం వల్ల రాజకీయంగా కాంగ్రెస్‌కు నష్టమే తప్ప లాభం ఉండదని పార్టీ నేతలు అభిప్రాయపడుతున్నారు. కాబట్టి ప్రస్తుతానికి అనర్హత వేటు వాయిదా వేయడమే మంచిదని వారు భావిస్తున్నారు.
జగన్ వర్గానికి చెందిన ఎమ్మెల్యేల్లో కొందరు మళ్ళీ కాంగ్రెస్‌కు తిరిగి వచ్చేందుకు సిద్ధంగా ఉన్నారని, అటువంటప్పుడు వేటుపై తొందరపడి నిర్ణయం తీసుకోరాదని అనుకుంటున్నారు. అనర్హత నిర్ణయం శాసనసభ స్పీకర్ పరిధిలోనిదే అయినప్పటికీ కాంగ్రెస్ శాసనసభ్యుడైనందున అధిష్ఠానం చెప్పినట్టు నడుచుకోవలసి ఉంటుందని, స్పీకర్ స్థానంలో ఏ పార్టీకి చెందిన వారు ఉన్నప్పటికీ ఇది తప్పనిసరి పరిస్థితిగా మారిందని కాంగ్రెస్ నేతలు అనుకుంటున్నారు.
శాసనసభ సమావేశాలు సోమవారం నుంచి ప్రారంభం కానుండగా శని, ఆదివారాల్లో స్పీకర్ తన నిర్ణయాన్ని ప్రకటించే అవకాశాలున్నాయని భావించారు. జగన్ వర్గానికి చెందిన ఎమ్మెల్యేలు కూడా ఇందుకు సిద్ధంగా ఉన్నారు. అయితే రాష్ట్రంలో కాంగ్రెస్ పార్టీకి రాజకీయంగా అనుకూల వాతావరణం లేనందున అనర్హత వేటు వేయడం మంచిది కాదన్న అభిప్రాయంతో కాంగ్రెస్ హైకమాండ్ ఉన్నట్టు తెలిసింది. తాజా పరిస్థితిపై అధిష్ఠాన వర్గం ముఖ్యమంత్రికి ఫోన్ చేసి తెలుసుకున్నట్టు సమాచారం. అనర్హత వేటుకు గురి కావలసిన 17మంది ఎమ్మెల్యేల్లో ఐదారుగురు తనతో ‘టచ్’లో ఉన్నారని, వారు మళ్ళీ కాంగ్రెస్ గూటికి వచ్చేందుకు సుముఖంగా ఉన్నారని అధిష్ఠానవర్గానికి ముఖ్యమంత్రి చెప్పినట్టు తెలిసింది. అందువల్ల జగన్ వర్గం ఎమ్మెల్యేలపై తక్షణం అనర్హత వేటు వేయకున్నా శాసనసభ సమావేశాల్లో ప్రభుత్వానికి పెద్దగా ఇబ్బందులు ఎదురు కావని కూడా చెప్పినట్టు సమాచారం. ఇదిలా వుంటే మంత్రి వర్గ విస్తరణ పిదప మంత్రుల్లోనే అసమ్మతి తలెత్తడం,మద్యం ముడుపులు వివాదం మంత్రుల అసంతృప్తి తదితర కారణాలను కూడా దృష్టి లో ఉంచుకుని కాంగ్రెస్ అధిష్టానం ఆచి తూచి అడుగు వేయాలని భావిస్తోంది.

కాపలాకుక్క గుంటనక్కలా మారింది !

2012-02-11T22:43:00.000+05:30

తెలంగాణ ప్రయోజనాలకు కాపలాకుక్కలా ఉంటానని చెప్పిన టిఆర్ఎస్ అధ్యక్షుడు కెసిఆర్ గుంటనక్కలా మారి తెలంగాణను అమ్ముకొంటున్నాడని తెలుగుదేశం పార్టీ తెలంగాణ ఫోరం కన్వీనర్ ఎర్రబెల్లి దయాకరరావు విమర్శించారు . తమ పార్టీ తెలంగాణ నేతలు రమేష్ రాధోడ్, పెద్దిరెడ్డి, అరవింద్ కుమార్ గౌడ్‌లతో కలిసి ఆయన శనివారం విలేకరులతో మాట్లాడారు. 'ఉద్యమం సెంటిమెంటును అమ్ముకొని కెసిఆర్ కుటుంబం ఆస్తులు కూడబెడుతోంది. సకల జనుల సమ్మె సమయంలో ఢిల్లీ వెళ్ళిన కెసిఆర్, ఆయన కొడుకు కెటిఆర్ అక్కడ కొన్ని గంటలపాటు అదృశ్యమయ్యారు. ఉద్యమం చేసేవాడికి దొంగచాటు వ్యవహారాలు ఎందుకు? ప్రజలు చావోరేవో అని పోరాడితే నువ్వు ఇదే సందని వ్యాపారాలు చేసుకొంటున్నావు. నీ పత్రిక నమస్తే తెలంగాణ ఎండీ రాజంను ఆజాద్ వద్దకు ఎందుకు పంపావు? వ్యాపారం కోసం కాదా? రాజంను తీసుకొని ఆజాద్, అహ్మద్ పటేల్‌ను నువ్వు కలవలేదా? ఇంకా సిగ్గులేకుండా టిడిపిని తిడుతున్నావు. సోనియాను ఏనాడైనా ఒక్క మాట అన్నావా? తెలంగాణ ఇవ్వాల్సింది అధికారంలో ఉన్నఆమెనా లేక ప్రతిపక్షంలో ఉన్న మేమా?ఓడిపోయి ఉన్న పార్టీని తిడితే రాష్ట్రం వస్తుందా? నీవి బుక్కా ఫకీరు వేషాలు. నీ అవినీతి, మోసాలను తెలంగాణ ప్రజలు కనిపెడుతూనేఉన్నారు' అని ఆయన అన్నారు. మంత్రిగా ఉన్న సమయంలో మేడారంజాతర కెసిఆర్‌కు ఎందుకు గుర్తుకు రాలేదని ఎర్రబెల్లి ప్రశ్నించారు. 'మేడారం వెళ్ళడానికి నీకు హక్కే లేదు. అధికారంలో ఉన్నప్పుడు నువ్వు అటు తిరిగే చూడలేదు. దేవత నీపై కొబ్బరికాయ పడవేసిందని అబద్దాలు చెబుతున్నావు. బుద్ది తెచ్చుకోవాలని అక్కడకు వచ్చిన భక్తులు నీ నెత్తినకొట్టిన కొబ్బరికాయ అది' అని ఆయన వ్యాఖ్యానించారు. తెలంగాణ బిడ్డలం కాబట్టి ఇంతకాలం కెసిఆర్ ఏం మాట్లాడినా సహించామని, పిచ్చి ప్రేలాపనలు మానకపోతే రాళ్ళతో కొడతామని అరవింద్ కుమార్ గౌడ్ హెచ్చరించారు. 'ప్రత్యేక రాష్ట్రం రావడానికి అసెంబ్లీ తీర్మానం అవసరమే లేదని, పార్లమెంటు ద్వారానే అది వస్తుందని 2004లో కెసిఆర్ స్వయంగా చెప్పారు. ఆయన చేసిన పత్రికా ప్రకటనలు కూడా ఉన్నాయి. ఇప్పుడు ఉప ఎన్నికలు వచ్చాయని అసెంబ్లీలో ప్రైవేటు తీర్మానం పెడతానని చెబుతున్నాడు. ఇదే తీర్మానం పార్లమెంటులో ఎందుకు పెట్టలేదు? అక్కడ బిజెపి తప్ప టిఆర్ఎస్ ప్రయత్నమే చేయలేదు. ఉప ఎన్నికలు వస్తేనే ఈయనకు తెలంగాణ గుర్తుకు వస్తుంది' అని పెద్దిరెడ్డి అన్నారు.

లక్ష కోట్లు దిగమింగి లక్ష విగ్రహాలు పెడుతున్నారు

2012-02-11T22:32:00.000+05:30

వైఎస్సార్ కాంగ్రెస్ పార్టీ అధికారంలోకి వస్తే రాష్ట్రాన్ని అమ్మేస్తుందని తెలుగుదేశం అధినేత చంద్రబాబు అన్నారు. హైదరాబాద్ నగరంలోని కొంపల్లి, ఎక్స్‌లెన్సీ గార్డెన్స్‌లో శనివారం జరిగిన యువతరంగాలు సదస్సులో పాల్గొన్న చంద్రబాబు మాట్లాడుతూ ఐఏఎస్ అధికారులు చెబుతున్న మాటలకు వైయస్ జగన్ సమాధానం చెప్పాలని డిమాండ్ చేశారు. తాము తిన్నది తక్కువేనని, పెద్ద తిమింగిలాలను పట్టుకోవాలని ఐఎఎస్ అధికారులు అంటున్నారని గుర్తు చేస్తూ దీనికి జగన్ సమాధానం చెప్పాలని ఆయన డిమాండ్ చేశారు. వైయస్ విగ్రహాలు చూస్తుంటే కుంభకోణాలు, హత్యలే గుర్తుకొస్తున్నాయని ఆయన వ్యాఖ్యానించారు. లక్ష కోట్ల రూపాయలు దిగమింగి లక్ష విగ్రహాలు స్థాపిస్తున్నారని ఆయన అన్నారు.తెలంగాణలో జగన్ కి టీఆర్ఎస్ నాయకులు రెడ్ కార్పెట్ పరిచారని, తమపైకి రాళ్లు విసిరారని చంద్రబాబు అన్నారు. పోలవరం టెండర్ల రద్దు తమ విజయమేనని, తాము చేసిన ఆరోపణల వల్లనే పోలవరం టెండర్లను ముఖ్యమంత్రి రద్దు చేశారని ఆయన అన్నారు. కేసీఆర్ కు మంత్రి పదవి ఇచ్చి ఉంటే ఈ రోజు తెలంగాణా విషయం చర్చ కొచ్చేది కాదని అన్నారు.రాజకీయాల్లో యువతకు 33శాతం ఇవ్వడానికి అన్ని విధాల కృషి చేస్తానని తెలిపారు.

ఈ యుగానికి నరరూప రాక్షసుడు కెసిఆర్'

2012-02-10T22:59:00.001+05:30

"ప్రతి యుగంలో ఒక రాక్షసుడు పుడుతూ వచ్చాడు. ఈ యుగానికి నరరూప రాక్షసుడు కెసిఆర్' అని తెలుగుదేశం పార్టీ నేత, మాజీ మంత్రి తలసాని శ్రీనివాస యాదవ్ వ్యాఖ్యానించారు. శుక్రవారం ఆయన ఎన్టీఆర్ భవన్‌లో విలేకరులతో మాట్లాడారు. 'చంద్రబాబును అపర భగీరధుడని పొగిడింది నువ్వే. ఇప్పుడు నాలుక తిరగేసి అడ్డగోలుగా తిడుతున్నావు. నీ నాలుకను చీరక్కర్లేదు. రెండు వేళ్ళతో లాగితే చాలు. ఊడొస్తుంది. ప్రతి ఎలెక్షన్‌తో కలెక్షన్ చేసుకొనే వసూల్ రాజావి నువ్వే అంటూ తలసాని దుయ్యబట్టారు.ఉప ఎన్నికలు వచ్చాయని లేచొచ్చావు. 2009 ఎన్నికల్లో టిక్కెట్లు అమ్ముకొంటే నీ పార్టీ కార్యాలయంలోనే కార్యకర్తలు ఉరికించి కొట్టలేదా? హైదరాబాద్‌లో సినిమా వాళ్ళను మొదలుకొని వ్యాపారుల వరకూ అందరినీ బ్లాక్‌మెయిల్ చేసి కోట్లు కూడబెట్టావు. చివరకు సమ్మెను కూడా అమ్ముకొన్న ఘనత నీది. నీకన్నా నీచ నికృష్ట కు సంస్కార నాయకుడు మరొకడు లేడు. చంద్రబాబు తన కుటుంబ సభ్యులతో సహా అందరి ఆస్తులు ప్రకటించాడు. నీకు ఆ దమ్ముందా? నమస్తే తెలంగాణ పత్రికలో రూ.నాలుగు కోట్లు పెట్టుబడి పెట్టానని చెబుతున్నావు? ఆ డబ్బు ఎక్కడ నుంచి వచ్చింది? పోలవరం టెండర్లు పోయాయన్న అక్కసుతో మా పార్టీని తిడుతున్నావు' అని ఆయన అన్నారు. ఉప ఎన్నికల్లో తొంభై శాతం ఓట్లు వస్తాయని సర్వేల్లో వచ్చిందని చెబుతున్న కెసిఆర్ అన్ని ఓట్లు రాకపోతే ఆబిడ్స్‌లో ముక్కు నేలకు రాస్తాడా అని ఆయన సవాల్ విసిరారు.ఆయనకు తొంభై శాతం ఓట్లు వస్తే తాము ముక్కు నేలకు రాస్తామని ఆయన ప్రకటించారు. ప్రొఫెసర్ జయ శంకర్ చనిపోయిన తర్వాత ఆయనను కెసిఆర్ తెగ పొగుడుతున్నారని, బతికి ఉండగా కెసిఆర్ బాగా తాగి ఆయనను కాలితో తన్నిన ఘటనకు నలుగురు సాక్ష్యం ఉన్నారని తలసాని చెప్పారు.

కేసీఆర్ రెచ్చిపోయి మాట్లాడొద్దు!

2012-02-10T18:23:00.000+05:30

కేసీఆర్ రెచ్చిపోయి మాట్లాడొద్దు ! అని తెలుగుదేశం అధినేత చంద్ర బాబు హెచ్చరించారు, టీఆర్ఎస్ అధినేత తన ప్రవర్తన మార్చుకోవాలని, సంస్కారవంతంగా మాట్లాడడం నేర్చుకోవాలని బాబు సూచించారు. రాజకీయాల్లో హుందాతనం అవసరమని, తమ నేతలు కూడా కేసీఆర్ కంటే ఎక్కువగా మాట్లాడగలరని ఆయన అన్నారు. శుక్రవారం చిత్తూర్ జిల్లాలోని యువతరంగం సదస్సులో పాల్గొనేందుకు వచ్చిన బాబు మీడియాతో మాట్లాడుతూ తాము పోలవరం టెండర్లపై మాట్లాడుతున్నామని కేసీఆర్ అనవసరపు ఆరోపణలు చేస్తున్నారని బాబు విమర్శించారు.పోలవరం టెండర్ల విషయంలో ముఖ్యమంత్రి, టీఆర్ఎస్ నేతలు అవకతవకలకు పాల్పడ్డారని, టీడీపీకి భయపడే ప్రభుత్వం పోలవరం టెండర్లు రద్దు చేసిందని చంద్రబాబు అన్నారు. మద్యం మాఫియా వ్యవహారానికి సీఎం కిరణ్ పూర్తి బాధ్యత వహించాలని పేర్కొన్నారు. ఏసీబీ దాడులు కొన్ని జిలాల్లోనే జరగడం వెనక ఆంతర్యమేంటని చంద్రబాబు ప్రశ్నించారు. మద్యం సిండికేట్లలో మంత్రి మోపిదేవి అవినీతికి పాల్పడ్డారని, తక్షణమే ఆయనను పదవి నుంచి తప్పించాలని బాబు డిమాండ్ చేశారు. లిక్కర్ సిండికేట్లకు సంబంధించిన ఎసిబి రిపోర్టును బహిర్గతం చేయాలని చంద్రబాబు డిమాండ్ చేశారు.

అబద్దాలకు పెద్ద కొడుకు చంద్రబాబు

2012-02-09T19:02:00.000+05:30

చంద్రబాబు బ్రతుకు అంతా కుట్రల మయం అని తెలంగాణ రాష్ట్ర సమితి అధినేత కే చంద్రశేఖరరావు అన్నారు. విద్యుత్ ఛార్జిలపై పోరాడిన ముగ్గుర్ని కాల్చి చంపిన చరిత్ర చంద్రబాబుదని ఆయన పేర్కొన్నారు. కుట్రలకు కేరాఫ్ అడ్రస్, అబద్దాలకు పెద్ద కొడుకు చంద్రబాబు అని దుయ్య బట్టారు. గోదావరిలో మునిగినా ఆయన పాపాలు పోవని కేసీఆర్ మండిపడ్డారు. పోలవరం టెండర్లలో అక్రమాలు జరిగాయని తెలుగుదేశం పార్టీ చేస్తున్న ఆరోపణలపై హైకోర్టు సిట్టింగ్ జడ్జితో విచారణ జరిపించాలని కేసీఆర్ డిమాండ్ చేశారు. తెలంగాణ ప్రాంతంలోని ఆస్తులను అమ్మిన చరిత్ర బాబుదన్నారు. తెలంగాణ ప్రాంతానికి ద్రోహం చేసిన వ్యక్తి చంద్రబాబు అని ఆయన ఆగ్రహం వ్యక్తం చేశారు.
కుంభకోణాల్లో విచారణకు ముందుకు రాకుండా కోర్టుల్లో స్టే తెచ్చుకున్న ఖ్యాతి బాబుదేనన్నారు. పోలవరం టెండర్లపై సీబీఐ విచారణ చేయించాలని.. మా తప్పులేదని తేలితే ముక్కు నేలకు రాస్తారా అని చంద్రబాబుకు కేసీఆర్ సవాల్ విసిరారు.

గ్రూపులన్నీ ఏకం కాకపోతే "జగన్" నుంచి ప్రమాదం

2012-02-09T12:43:00.000+05:30

కాంగ్రెస్ పార్టీలోని గ్రూపులన్నీ ఎన్నికల నాటికి ఏకతాటిపైకి రాకపోతే వైఎస్ జగన్ పార్టీ నుంచి పెనుప్రమాదం తప్పదని తాడిపత్రి ఎమ్మెల్యే జేసీ దివాకర్‌రెడ్డి వ్యాఖ్యానించారు. కాంగ్రెస్ పార్టీ సీని యర్ నాయకుడు నర్సోజీరావు కుమార్తె వివాహ వేడుకల్లో పాల్గొనేందుకు హిందూపురానికి వచ్చిన ఆయన విలేకరులతో మాట్లాడుతూ రాష్ట్ర కేబినెట్‌లో తనకు చోటు దక్కకపోవడానికి జిల్లాకు చెందిన ఇద్దరు మంత్రులు అడ్డు కోవడం కారణం కాదని, అయినా తనను వాళ్లేం చేస్తారని అన్నారు. అధిష్ఠానం అంగీకరిస్తే పదవులు అవే వస్తాయన్నారు.అనుచరులకు నామినేటెడ్ పదవులపై మాట్లాడుతూ 'అవి వచ్చేవా? పొయ్యేవా? అయినా ఏదో డైరెక్టర్, లేదా ఇతర పదవుల కోసం ప్రయత్నించేది లేద'ని తెగేసి చెప్పారు. జిల్లాకు చెందిన కొందరు పొగరుతో 96 ఓట్లు అధికంగా ఉన్నాయని భావించి ఎవరి అవసరం లేదన్నందుకే ఎమ్మెల్సీ ఎన్నికల్లో ఓడిపోవాల్సి వచ్చిందని మంత్రులను పరోక్షం గా విమర్శించారు. కాంగ్రెస్ పార్టీలో గ్రూపులు, విభేదాలు సహజమని, ఎప్పుడై నా ఒకతాటిపైకి రాక తప్పదన్నారు. అందు కోసం తన వంతు కృషి చేస్తాన న్నారు. కార్యకర్తల కోసం నియోజకవర్గాల వారీగా పర్యటిస్తానన్నారు.
వచ్చే స్థానిక సంస్థల ఎన్నికల నాటికి కాంగ్రెస్‌లోని నాయకులంతా ఏకతాటిపైకి వస్తేనే ఫలితముంటుందన్నారు. హిందూపురంలో కాంగ్రెస్ పార్టీకి బలముందని, స్థానిక నాయకుల మధ్య విభేదాలతోనే పార్టీ దెబ్బతింటోందన్నారు. త్వరలో జరుగబోయే మునిసిపల్ ఎన్నికల నాటికి ఇక్కడి గ్రూపులను ఒక్కటి చేస్తానని ధీమా వ్యక్తం చేశారు.కులమతాలతో సంబంధం లేకుండా చేనేత వృత్తిపై ఆ ధారపడి ఎందరో జీవిస్తున్నారని, వారికోసం జగన్ ఆందోళన చేస్తే కంగ్రాట్స్ అన్నారు.

మంత్రి పదవి గడ్డిపోచతో సమానం

2012-02-08T19:33:00.000+05:30

వైద్య-ఆరోగ్య శాఖను విభజించిన పద్ధతిపై ఆగ్రహించిన మంత్రి డి.ఎల్. మనసు మార్చుకున్నారు. అసంతృప్తితో రగిలిపోతున్న డి.ఎల్. మంత్రి పదవికి రాజీనామా చేస్తారన్న ఊహాగానాలకు ప్రస్తుతానికి తెర దించారు. కొన్ని దురదృష్ట సంఘటనలు తమను బాధించాయని ఆయన చెప్పారు.మంత్రి పదవికి రాజీనామా చేస్తానని తాను చెప్పలేదని, కఠిన నిర్ణయం తీసుకుంటానని మాత్రమే చెప్పినట్టు ఆయన గుర్తు చేశారు. పార్టీ అధిష్ఠానంతో మాట్లాడిన అనంతరం తమ కఠిన నిర్ణయాన్ని వాయిదా వేసుకున్నట్టు ఆయన చెప్పారు. మంత్రి డి.ఎల్. బుధవారం మీడియాతో మాట్లాడుతూ తమ ఆవేదనను వెల్లడించారు.
పాలనాపరమైన సౌలభ్యంకోసం విభజించినట్టు చెబుతున్నారని, మరి ఆ రోజున మూడు శాఖలను ఎందుకు కలిపారో, ఇప్పుడు ఎందుకు విభజించారో సమాధానం చెప్పాలని అంటూ ఉన్నత స్థానాలలో ఉన్న వ్యక్తులు అబద్ధాలు చెప్పకూడదని డి.ఎల్. అన్నారు . ఉన్నత స్థానాలలో ఉన్న వ్యక్తులు చెప్పిన పని తాను చేయకపోవచ్చునని, కాని తాను ఎప్పుడూ ప్రజాహితంకోసమే పనిచేస్తానని ఆయన చెప్పారు. సి.ఎం. కిరణ్‌ను తాను పదవి అడగలేదంటూ, శాఖను విడగొట్టిన పద్ధతి కత్తితో పొడిచినట్టుందని ఆయన అన్నారు.
కాంగ్రెస్ పార్టీకి ద్రోహం చేయనని , పార్టీకి క్రమశిక్షణగల కార్యకర్తగా పనిచేశానని, గతంలో ఎన్నో కీలకమైన బాధ్యతలు నిర్వహించాననీ ఆయన వివరించారు. గతంలో ఎన్నడూ పల్లెత్తు మాట పడలేదని, మంత్రి పదవి తనకు గడ్డిపోచతో సమానం అని ఆయన వివరించారు.

రాజీనామా యోచనలో ఇద్దరు మంత్రులు ?

2012-02-07T23:05:00.000+05:30

మద్యం ముడుపుల ఆరోపణల్లో ఎక్సైజ్‌శాఖ మంత్రి మోపిదేవి వెంకటరమణ ఇరుక్కున్నారు. ఖమ్మం జిల్లా మద్యం వ్యాపారుల నుంచి 10 లక్షల రూపాయల్ని పుచ్చుకున్నట్టు ఏసీబీ విచారణలో బట్టబయలైనట్టు సమాచారం. మంత్రికి లంచం ఇచ్చినట్టు ఖమ్మం జిల్లాకు చెందిన చంద్ర వైన్స్ యజమాని నున్న రమణ వెల్లడించినట్టు తెలిసింది. హైదరాబాద్ లోని క్వార్టర్ లో మంత్రిని కలిసి పది లక్షల రూపాయల ఇచ్చినట్లు ఆయన తెలిపినట్లు సమాచారం. తన మిత్రుడు రాజబాబుతో కలిసి మంత్రిని కలిసినట్లు రమణ చెప్పినట్లు తెలిసింది. ఇదిలా ఉండగా, ఖమ్మం మద్యం వ్యాపారుల సిండికేట్ సభ్యులు తనకు తెలియదని మంత్రి మోపిదేవి వెంకటరమణ తెలిపారు. తాను ఎవరి వద్ద నుంచి లంచాలు పుచ్చుకోలేదని మంత్రి ఖండించారు. కావాలనే తనపై దుష్ప్రచారం చేస్తున్నారని ఆయన చెప్పారు. బుధవారం సీఎంను కలిసి ఈ ఆరోపణలపై వివరణ ఇచ్చుకుంటానని ఆయన మీడియాకు వెల్లడించారు.ఈ కేసు తో తనకు సంబంధం లేదంటున్న మంత్రి రాజీనామా చేసే యోచనలో వున్నట్టు సమాచారం.కాగా తన శాఖలు కత్తిరించినందుకు ఆగ్రహం తో ఉన్న మంత్రి డీఎల్ కూడా రాజీనామా చేసే యోచనలో వున్నట్టు ప్రచారం జరుగుతోంది.

'తెలంగాణ' కేసుపై హైకోర్టుకు బాబు

2012-02-07T09:14:00.001+05:30

తెలంగాణపై ఇచ్చిన హామీని చంద్రబాబు వెనక్కు తీసుకున్నారంటూ దాఖలైన కేసును కొట్టివేయాలని టీడీపీ అధినేత చంద్రబాబు సోమవారం హైకోర్టును ఆశ్రయించారు. ప్రత్యేక రాష్ట్ర ఏర్పాటుపై ఇచ్చిన హామీని బాబు వెనక్కు తీసుకోవడం వల్ల.. పెద్ద సంఖ్యలో ప్రజలు ఆత్మహత్య చేసుకున్నారని, దీనిపై ఆయనను ప్రాసిక్యూట్ చేయాలని తెలంగాణ జూనియర్ న్యాయవాదుల సంఘం ప్రైవేటుగా ఫిర్యాదు చేసిన విషయం తెలిసిందే.దీనిని విచారించిన సైబరాబాద్‌లోని 11వ మెట్రోపాలిటిన్ మెజిస్ట్రేట్ కేసు నమోదు చేయాలని పోలీసులను ఆదేశించారు. ఈ మేరకు దర్యాప్తు జరిపిన పోలీసులు ఈ ఫిర్యాదు రాజకీయ ప్రేరేపితమని, తెలంగాణలో చోటుచేసుకున్న ఆత్మహత్యలతో చంద్రబాబుకు సంబంధం లేదని మెజిస్ట్రేట్ కోర్టుకు నివేదిక సమర్పించారు. కానీ, దీనిపై పిటిషనర్లు ప్రొటెక్షన్ పిటిషన్ వేసి తమ వాదనలు వినిపించారు. బాబు ఫిబ్రవరి 9న జరిగే విచారణకు హాజరై వివరణ ఇవ్వాలని మెజిస్ట్రేట్ ఆదేశించారు. తాజాగా.. ఈ కేసును కొట్టి వేయాలంటూ చంద్రబాబు హైకోర్టులో క్వాష్ పిటిషన్ దాఖలు చేశారు.

క్యాబినెట్లో ముగ్గురికి ఛాన్స్

2012-02-06T19:12:00.001+05:30

రాష్ట్ర మంత్రివర్గాన్ని విస్తరించారు.ఇందులో భాగంగా సోమవారం రాజ్‌భవన్‌లో కొత్తగా ముగ్గురు మంత్రులు ప్రమాణస్వీకారం చేశారు. రంగారెడ్డి జిల్లా వికారాబాద్ ఎమ్మెల్యే ప్రసాదరావు, శ్రీకాకుళం జిల్లా రాజాం ఎమ్మెల్యే కొండ్రు మురళీమోహన్, నల్గొండ జిల్లా హుజూర్‌నగర్ ఎమ్మెల్యే కెప్టెన్ ఉత్తమ్‌కుమార్‌రెడ్డి మంత్రులుగా ప్రమాణస్వీకారం చేశారు. కొత్తగా ముగ్గురు మంత్రుల చేరికతో మంత్రివర్గ సంఖ్య 41కి చేరుకుంది. ప్రసాదరావు, కొండ్రు మురళీమోహన్‌లు తెలుగులో దైవసాక్షిగా ప్రమాణం చేయగా.. ఉత్తమ్‌కుమార్‌రెడ్డి ఆంగ్లంలో ప్రమాణ స్వీకారం చేశారు. ప్రమాణస్వీకార కార్యక్రమానికి రాష్ట్ర మంత్రులు, కాంగ్రెస్ నాయకులు, తిరుపతి ఎమ్మెల్యే చిరంజీవి హాజరయ్యారు.క్యాబినెట్ లో స్థానం కోసం మాజీ మంత్రి జేసీ చేసిన ప్రయత్నాలు ఫలించలేదు. భట్టి విక్రమార్కకు చోటు దొరుకుతుందని భావించినా ఆయనకు ఛాన్స్ దొరకలేదు.

సీపీఎం కార్యదర్శిగా బీవీ రాఘవులే

2012-02-05T05:04:00.001+05:30

సీపీఎం రాష్ట్ర పార్టీ రాష్ట్ర కార్యదర్శిగా మళ్లీ బీవీ రాఘవులే ఎన్నికయ్యారు. ఈ పదవికి ఆయన ఎన్నికవ్వడం ఇది ఐదోసారి. 1997లో నల్లగొండలో జరిగిన 19వ మహాసభలో ఆయన తొలిసారి కార్యదర్శి పదవి చేపట్టారు. అప్పట్నుంచి ఇప్పటివరకు అంటే సుమారు 15 ఏళ్లుగా ఆయన ఈ పదవిలో కొనసాగుతున్నారు. తాజా ఎన్నికతో రాఘవులు మరో మూడేళ్లపాటు కార్యదర్శి పదవిలో కొనసాగుతారు. ఖమ్మం లో జరుగుతోన్న సీపీఎం 23వ రాష్ట్ర మహాసభల చివరిరోజు శనివారం పార్టీ నూతన కార్యవర్గాన్ని ప్రకటించారు. 81 మందితో కూడిన రాష్ట్ర కమిటీ సమావేశమై కార్యదర్శివర్గాన్నీ, కార్యదర్శిని ఎన్నుకుంది. పాత రాష్ట్ర కమిటీ నుంచి ఆరుగురు సభ్యులు వివిధ కారణాల రీత్యా తప్పుకోగా వారిస్థానంలో కొత్తవారు వచ్చారు. బి.ఆర్.తులసీరావును రాష్ట్ర కంట్రోల్ కమిషన్ చైర్మన్‌గా నియమించారు. 15 మందితో కూడిన రాష్ట్ర కార్యదర్శివర్గం కూర్పును పరిశీలిస్తే...కమ్మ సామాజిక వర్గం-ఆరుగురు, రెడ్డి-2, ఎస్సీ-3, ఎస్టీ-1, మైనార్టీలు-1, బీసీలు- ఇద్దరు వున్నారు.వాస్తవానికి రాఘవులు ఈసారి తప్పుకోవాలనుకున్నారు. వీరయ్య, తమ్మినేని వీరభద్రం పేర్లు పరిశీలనకు వచ్చాయి. తమ్మినేని అభ్యర్థిత్వాన్ని పలువురు వ్యతిరేకించారు. దీంతో వీరయ్య పేరు తెరపైకి వచ్చింది కానీ ఆయనను కొందరు వ్యతిరేకించారని సమాచారం. రాష్ట్ర కమిటీ తర్జనభర్జనల అనంతరం రాఘవుల్నే కొనసాగించేలా నిర్ణయం తీసుకుని కొత్త కమిటీ ముందు ప్రతిపాదించింది. దీంతో ఆయన్నే కార్యదర్శిగా ప్రకటించారు.

జయ పై విష ప్రయోగం జరిగిందా ??

2012-02-04T23:41:00.000+05:30

అనగనగా ఒక అందాల యువరాణి. ఆమెకు అయినవారెవరూ ఉండరు. జగమంత కుటుంబం నాది.. ఏకాకి జీవితం నాది అనుకుంటూ ఉంటుంది. ఆమెను నాశనం చేయటానికి అనేక మంది కాచుకొని ఉంటారు. వారందరిని ఆమె ఎలా ఎదుర్కొందనేదే సస్పెన్స్! ..ఒకప్పుడు ఇలాంటి కథలున్న అనేక సినిమాల్లో జయలలిత హీరోయిన్‌గా నటించారు. కానీ.. నిజజీవితంలోనూ ఆమె పరిస్థితి అదే! నమ్మకద్రోహాలూ.. పదవి నుంచి తొలగించటానికి కుట్రలూ కూహకాలూ.. అసెంబ్లీలో దుశ్శాసనపర్వాలు.. వెరసి, తమిళనాడు ముఖ్యమంత్రి జయలలిత జీవితం ఒక రంగుల విషవలయం! ఇటీవలే.. ఆమెపై విషప్రయోగమూ, మంత్రతంత్రప్రయోగాలూ జరిగాయట!! ఈ దారుణాలన్నిటికీ ఒడిగట్టింది మరెవరో కాదు... జయలలిత తన ప్రాణ స్నేహితురాలిగా భావించిన నెచ్చెలి శశికళేనంటూ తెహల్కా పత్రిక సంచలనాత్మక కథనాన్ని ప్రచురించింది.

పెద్దమ్మ... పురచ్చితలైవి.. అంటే జయలలిత!ఆమెకొక నీడ ఉంది. ఆ నీడ తన నెచ్చెలి, ప్రాణస్నేహితురాలు, ఆత్మబంధువు, అంతకన్నా ఎక్కువ.. అని జయ భావిస్తారు!ఆ నీడ పేరు... చిన్నమ్మ.. అంటే శశికళ!అధినేత్రికి సైతం భయపడని అన్నాడీఎంకే నేతలు కొందరు.. ఆ నీడకు భయపడతారు. వంగివంగి దండాలు పెడతారు.కానీ.. ఇదంతా గతం. 2011 డిసెంబర్ 17 నుంచి పరిస్థితి మొత్తం మారిపోయింది.పెద్దమ్మ, చిన్నమ్మల మధ్య ఎన్నో ఏళ్లుగా అల్లుకున్న అనుబంధం తెగిపోయింది. శశికళతో సహా.. జయలలిత నివాసంలో ఉన్న ఆమె బంధువులందరినీ పురచ్చితలైవి సన్నిహితులు బయటకు పంపేశారు. కాదుకాదు.. మెడపట్టి బయటికి గెంటినంత పని చేశారు. ఎందుకలా వెళ్లగొట్టారు? అసలేం జరిగింది? ఈ ప్రశ్నలకు సమాధానాలేవీ ఇప్పటికీపూర్తిగా బయటకు రాలేదు. అయితే, అన్నాడీఎంకే నేతలు చెప్పారంటూ తెహల్కా పత్రిక ఇటీవలే ఒక సంచలనాత్మక కథనాన్ని ప్రచురించింది.దాని ప్రకారం... రెండు నెలల క్రితం ఒక ఎన్నారై తమిళనాడులో పెట్టుబడులు పెట్టడానికి వచ్చాడు. అందరి మాదిరిగానే పెట్టుబడుల విషయంలో చిన్నమ్మను కలిశాడు. సహజంగానే.. చిన్నమ్మ , ఆమె బంధువులు (మన్నార్‌గుడి మాఫియా అని కొందరు పిలుచుకుంటూ ఉంటారు) ఆ ఎన్నారై దగ్గర 15 శాతం 'కట్' అడిగారు. అలా కమిషన్ ఇవ్వడానికి ఇష్టపడని ఆ ఎన్నారై గుజరాత్‌కు వెళ్లాడు. ఆ రాష్ట్రముఖ్యమంత్రి మోడిని కలిశాడు.
మోడి ఈ విషయాన్ని ఒక సందర్భంలో జయలలితకు చెప్పారు. జాగ్రత్తగా ఉండకపోతే ఇబ్బందులు ఎదురువుతాయని హెచ్చరించారు. ఇది జరిగిన వెంటనే చెన్నై మోనో రైలు ప్రాజెక్టు వివాదం జరిగింది. వాస్తవానికి ఈ ప్రాజెక్టును సింగపూర్‌కు చెందిన ఒక కంపెనీకి ఇవ్వమని జయలలిత అధికారులకు చెప్పారు. కానీ ఆ ఫైల్ ఆమె దగ్గరకు వచ్చేసరికి... మలేసియా కంపెనీ దక్కించుకున్నట్లు ఉంది. కానీ, అందులో పెట్టిన సంతకం ఆమెది కాదని.. ఎవరో జయలలిత సంతకాన్ని ఫోర్జరీ చేశారని తేలింది. శశికళను అడిగితే తనకు తెలియదని సమాధానం చెప్పింది. ఈ నేపథ్యంలోనే వారిద్దరికీ మధ్య దెబ్బలాట జరిగింది. శశికళపై అనుమానం రావడంతో... జయలలిత తాను తీసుకొనే మందుల గురించి డాక్టర్లను సంప్రదించారు. ఆమె వాడుతున్న మందులను వైద్యులు పరీక్షించగా.. ఎవరో ఆమెకు మత్తుమందులు, చిన్న మొత్తంలో విషం ఇస్తున్నట్లు తేలింది.జయలలితకు రోజూ మందులు ఇవ్వటానికి, పళ్లరసాలు అందించటానికి ఒక నర్సు ఉంది. ఆమె కూడా శశికళ నియమించిన వ్యక్తే. దీంతో జయలలితలో కొంత కంగారు మొదలయింది. అదే సమయంలో.. డీఎంకే నేత స్టాలిన్‌పై పెట్టిన కేసు చాలా బలహీనంగా ఉందని.. దీనికి శశికళే కారణమని కూడా కొన్ని ఆరోపణలు వచ్చాయి. దీనిపై జయలలిత అప్పటి ఐజీ పోన్ మణికేవల్‌ను ప్రశ్నించారు. శశికళ బలహీనమైన కేసు పెట్టమని చెప్పారని ఆయన వెల్లడించడంతోపరిస్థితి చేయి దాటిపోయిందని జయకు అర్థమైంది.

బెంగళూరులో రహస్య సమావేశం
2011, డిసెంబర్ మొదటివారంలో.. శశికళ కుటుంబసభ్యులందరూ కలిసి బెంగళూరులో నిర్వహించిన ఒక సమావేశం గురించి తమిళనాడు డీజీపీ కె.రామానుజం జయలలితకు చెప్పారు. ఈ సమావేశాన్ని బెంగళూరు ఇంటిలిజెన్స్ విభాగం అధికారులు ట్యాప్ చేశారు. ఆ టేపులను కర్ణాటక డీజీపీ శంకర్ బిదారీ తమిళనాడు డీజీపీ రామానుజంకు ఇచ్చారు. జయలలితకు వ్యతిరేకంగా తీసుకున్న అనేక నిర్ణయాలు ఆ టేపుల్లో ఉన్నాయి. ఈ టేపులు విన్న తర్వాత జయలలితకు వాస్తవ పరిస్థితి అర్థమైంది. వెంటనే ఆమె.. శశికళపైనా, ఆమె కుటుంబసభ్యులపైనా నిఘా పెట్టమని పోలీసులను ఆదేశించారు. వారి ఫోన్లన్నిటినీ ట్యాప్ చేయటం మొదలుపెట్టారు.
అనంతరం చకచకా పావులు కదిపి శశికళకు సన్నిహిత అధికారులను బదిలీ చేశారు. మంత్రివర్గాన్ని హాజరుపరచి ఇకపై అన్ని నిర్ణయాలు తనను అడిగే తీసుకోవాలని.. ఏవిషయంలోనూ శశికళ ప్రమేయం ఉండదని స్పష్టం చేశారు. అనంతరం డిసెంబర్ 17న శశికళను, ఆమె బంధువులను ఇల్లు వదిలిపొమ్మని జయలలిత ఆదేశించింది. వీరిలో చాలా మంది ఆ ఇంట్లో 1989 నుంచి నివాసం ఉంటున్నారు. వారందరూ జయలలిత కాళ్లావేళ్లా పడ్డారు. కానీ జయ కరగలేదు. 'అమ్మ' అనుగ్రహం ఎంత గొప్పగా ఉంటుందో... ఆగ్రహం అంత కఠినంగా ఉంటుందని వారందరికీ అర్థమైంది.తాంత్రిక పూజలు కూడా...అదే సమయంలో రాష్ట్ర మంత్రి కె.వి. రామలింగం ముఖ్యమంత్రిని కలవటానికి వచ్చారు. జయలలిత ఆయనను చూసి చిరునవ్వు నవ్వి.. "భవిష్యత్తు ముఖ్యమంత్రిగారికి స్వాగతం'' అని వ్యంగ్యంగా ఆహ్వానించారట. దాంతో రామలింగానికి ముచ్చెమటలు పట్టాయి! నిజానికి రామలింగం శశికళ మనిషి.ఆయనకు మూఢనమ్మకాలున్నాయని, మంత్ర, తంత్ర శాస్త్రాలను నమ్ముతారని.. 2011లో పార్టీ గెలవటానికి పూజలు చేశారని చెప్పుకొంటారు. అయితే గత కొన్ని నెలలుగా రామలింగం కేరళలో ఉన్న ఒక తాంత్రికుడిని ఉపయోగించి పూజలు చేయిస్తున్నాడని నిఘా వర్గాలు కనుగొన్నాయి. జయలలితను తొలగించి శశికళను ముఖ్యమంత్రి చేయాలనేది తన ఉద్దేశమని పైకి చెబుతున్నా.. రామలింగం శశికళను కూడా మోసం చేశారని.. తాను ముఖ్యమంత్రి అయ్యేందుకేపూజలు చేయించారని ప్రచారం. ఈ విషయం తెలియడంతోనే జయ ఆయనను "భవిష్యత్తు ముఖ్యమంత్రిగారు'' అని వ్యంగ్యంగా సంబోధించినట్టు చెబుతున్నారు

శశికళ ఆస్తులు.. రూ5వేల కోట్లు
శశికళ వ్యాపార సామ్రాజ్యం విలువ రూ.5000 కోట్లని అంచనా. 2011 ఎన్నికల్లో కూడా శశికళ, ఆమె బంధువులు అసెంబ్లీ టిక్కెట్లు అమ్ముకున్నారని, దీనిద్వారా దాదాపు రూ.300 కోట్లు సంపాదించారనేది ఒక అంచనా. అన్నాడీఎంకే అధికారంలోకి వచ్చిన ఆరు నెలల్లో వీరందరూ రూ.వెయ్యి కోట్లకు పైగా సంపాదించారని సమాచారం. వీరి పెట్టుబడులు తమిళనాడు, కర్ణాటక, కేరళలతో పాటు.. దుబాయ్, సింగపూర్‌లకు కూడా విస్తరించాయి.
మన్నార్‌గుడి మాఫియా
శశికళ, ఆమె భర్త నటరాజన్, ఆమె అన్న వి.కె.దివాకరన్ (ముద్దు పేరు బాస్), శశికళ బాబాయి డాక్టర్ కరుణాకరన్ కుమార్తెను పెళ్లి చేసుకున్న రావణన్, మిడాస్ మోహన్ (నటరాజన్ వ్యాపారాల్లో పార్ట్‌నర్), వి.కె. సుధాకరన్, టీటీవీ దివాకరన్( శశికళ మేనల్లుళ్లు), ఎం. రామచంద్రం (శశికళ ఇంకో అన్న)... వీరందరినీ కలిపి తమిళ రాజకీయాల్లో 'మన్నార్‌గుడి మాఫియా'గా పిలుచుకుంటారు.
courtesy...andhrajyothy

గానకోకిల క్షేమమే

2012-02-04T10:54:00.000+05:30

తాను క్షేమంగానే ఉన్నానని, తన ఆరోగ్యం బాగానే ఉందని గాన కోకిల లతా మంగేష్కర్ ట్విట్టర్‌లో సందేశం పోస్ట్ చేసారు . లతా మంగేష్కర్ మరణించారంటూ.. గురువారం ట్విట్టర్‌లో పెద్ద ఎత్తున సందేశాలు పోస్ట్ అయ్యాయి. దీంతో లతా అభిమానులంతా ఆందోళనకు గురయ్యారు. ఈ నేపధ్యం లో లతా మంగేష్కర్ శుక్రవారం.. "నా ఆరోగ్యానికి సంబంధించిన జరుగుతున్న పుకార్లను నమ్మకండి. దేవుడి దయ వల్ల నేను బాగానే ఉన్నాను'' అని ట్విట్టర్‌లో సందేశాన్ని పోస్ట్ చేశారు.

సోలార్ మిషన్ స్కాం లో లగడపాటి : టీఆర్ఎస్

2012-02-03T06:52:00.001+05:30

ఢిల్లీలోని సెంటర్ ఫర్ సైన్స్ ఎన్విరాన్‌మెంట్ ఇన్వెస్టిగేషన్‌లో కాంగ్రెస్ ఎంపీ లగడపాటి రాజగోపాల్ అవినీతి కుంభకోణం బయటపడిందని టీఆర్ఎస్ ఆరోపించింది.కేంద్ర ప్రభుత్వం ఈ వ్యవహారం లో జోక్యం చేసుకొని, సీబీఐ చే విచారణ జరిపించి, లగడపాటిని అరెస్ట్ చేయాలని డిమాండ్ చేసింది. పార్టీ పొలిట్‌బ్యూరో సభ్యుడు డి.శ్రవణ్‌కుమార్ మీడియాతో మాట్లాడుతూ "లగడపాటి రాజగోపాల్ నేషనల్ సోలార్ మిషన్ ఇచ్చే సబ్సిడీలను అప్పనంగా కొట్టేయాలని ప్రయత్నించారు. దాదాపు తొమ్మిది బినామీ కంపెనీలను సృష్టించి, ఒక్క కంపెనీకి ఒక్క ప్రాజెక్టు అనే నిబంధనను తుంగలో తొక్కి రూ.13వేల కోట్లు సంపాదించారు. ఒక కంపెనీకి 105 మెగా వాట్ల కంటే ఎక్కువ విద్యుత్ ఇవ్వకూడదు. అయితే లగడపాటి తన కుటుంబ సభ్యులు, ఇతర బినామీల పేర్లతో దొంగ కంపెనీలు సృష్టించారు. 60 శాతం ప్రాజెక్టుల్లో 40 శాతం ల్యాంకోవే'' అని ఆయన ఆరోపించారు.
ఇంత జరుగుతున్నప్పటికీ, కేంద్ర ప్రభుత్వం..నేషనల్ సోలార్ మిషన్..సెంట్రల్ విజిలెన్స్ కమిషన్ ఏం చేస్తోందని ప్రశ్నించారు. అవసరమైతే తాము ఈ విషయంలో సీబీఐకి లేఖ రాస్తామని తెలిపారు.

సిబిఐ కి కోర్టులో చుక్కెదురు

2012-02-03T06:41:00.000+05:30

వైఎస్సార్ కాంగ్రెస్ పార్టీ అధ్యక్షుడు జగన్మోహన్‌రెడ్డి ఆస్తుల కేసులో అరెస్ట్ అయిన జగతి పబ్లికేషన్స్ వైస్ ఛైర్మన్ విజయసాయిరెడ్డికి నార్కో అనాలిసిస్ పరీక్షలు నిర్వహించడానికి కోర్టు అంగీకరించలేదు. విచారణలో సాయిరెడ్డి సహకరించడంలేదని, సత్యశోధన పరీక్ష నిర్వహించేందుకు అనుమతించాలని సీబీఐ వేసిన పిటిషన్‌ను గురువారం నాంపల్లి కోర్టు తిరస్కరించింది.సాయిరెడ్డిని కస్టడీ సమయంలో సుమారు 32 సార్లు విచారించామని, ఏ విధమైన విషయాలు వెల్లడించలేదని, నార్కో టెస్ట్ వల్ల అసలు విషయాలు బయట పడతాయని సీబీఐ ప్రత్యేక కోర్టుకు తెలిపింది. ఈ అంశం పై వాదోపవాదనలు జరిగాయి. అయితే సాయి రెడ్డికి నార్కో అనాలిసిస్ టెస్టులు నిర్వహించడానికి అనుమతించాలనే సిబిఐ విజ్ఞప్తిని ఆయన తరఫు న్యాయవాది సుశీల్ కుమార్ వ్యతిరేకించారు. నార్కో అనాలిసిస్ టెస్టులు చట్ట విరుద్ధమని, వ్యక్తి స్వేచ్ఛకు భంగకరమని, ఈ విషయాన్ని ఓ కేసులో సుప్రీంకోర్టు స్పష్టం చేసిందని ఆయన వాదించారు. దీనిపై సిబిఐ పై కోర్టుకు వెళ్లే అవకాశం ఉంది.

2జీ స్కామ్‌లోచిదంబరానికి ఊరట

2012-02-02T15:23:00.000+05:30

2జీ టెలీకాం కుంభకోణంలో కేంద్ర హోంశాఖ మంత్రి చిదంబరానికి సుప్రీంకోర్టులో ఊరట లభించింది. 2జీ స్కామ్‌లో చిదంబరాన్ని సహ నిందితుడిగా చేర్చాలంటూ జనతాపార్టీ అధ్యక్షుడు సుబ్రహ్మణ్యస్మామి వేసిన పిటిషన్‌ను సుప్రీంకోర్టు నిరాకరించింది. నిందితుడిగా చేర్చాలంటూ ఆదేశాలు ఇవ్వలేమని, ఈ కేసుకు సంబంధించి విచారణకు కింది కోర్టుకు వెళ్లాల్సిందిగా సుప్రీం సూచించింది. 2జీ స్కామ్ కుంభకోణంలో చిదంబరంను కూడా విచారించేందుకు అదేశాలు ఇవ్వాలంటూ సుబ్రమణ్య స్వామి దాఖలు చేసిన పిటిషన్‌పై సుప్రీం కోర్టు తీర్పు నిచ్చింది.2008 ఫిబ్రవరి తర్వాత కేటాయించిన 122 రేడియో తరంగాల లైసెన్స్‌లను సుప్రీంకోర్టు రద్దు చేసింది. మళ్లీ వేలం పాట వేసి లైసెన్సులు జారీ చేయాలని ఆదేశించింది. లైసెన్స్‌లను పునరుద్ధరించే అంశాలను ట్రాయ్‌కే సుప్రీం కోర్టు వదిలేసింది. 2 జీ కేసు విచారణకు సిట్ అక్కర్లేదని, 2జీ కేసు ఇకపై సెంట్రల్ విజిలెన్స్ కమిషన్ పర్యవేక్షణలో జరుగుతుందని కోర్టు తీర్పు ఇచ్చింది. ఈ తీర్పుతో 12 కంపెనీలకు షాక్ తగిలింది.21 విడియోకాన్, 22 యూనినార్, 13 స్వాన్, 9 టాటా, 3 ఐడియాలకు సంబంధించిన లైసెన్స్‌లు రద్దు అయ్యాయి. దీంతో టెలీకాం రంగంలో షేర్లు ఒక్కసారిగా కుప్పకూలాయి. సుప్రీంకోర్టు తీర్పుపై జనతాపార్టీ నేత సుబ్రహ్మణ్య స్వామి హర్షం వ్యక్తపరిచారు. 2జీ స్కామ్‌పై సుప్రీం తీర్పు చరిత్రలో అత్యుత్తమైందని కొనియాడారు. తమ కృషి ఫలించదన్నారు.

స్టేలు తెచ్చుకోకుంటే బాబు ఈపాటికి జైల్లోఉండేవారు

2012-02-01T06:12:00.000+05:30

అవినీతి ఆరోపణలలో పీకల లోతుకి కూరుకుపోయిన టీ డీ పీ అధినేత చంద్రబాబు కోర్టులను ఆశ్రయించి స్టేలు తెచ్చుకోకుంటే ఈపాటికి జైల్లో ఊచలు లెక్కపెడుతుండే వారని పిసిసి అధ్యక్షుడు బొత్స సత్యనారాయణ అన్నారు. సారా వ్యాపారం చేసే వ్యక్తి పిసిసి అధ్యక్షుడా? అంటూ చంద్రబాబు చేసిన వ్యాఖ్యలపై బొత్స తీవ్రస్థాయిలో విరుచుకుపడ్డారు. అవినీతికి పాల్పడిన బాబు స్టేలు తెచ్చుకుని జైలు శిక్షను తప్పించుకుంటున్నారని ఎద్దేవా చేసారు. ‘నా కుటుంబ సభ్యులకు, బంధు మిత్రులకు 31 లిక్కర్ షాపులలో 27 శాతం వాటా ఉందని బహిరంగంగానే చెప్పాను. ప్రభుత్వ నిబంధనలకు లోబడి వ్యాపారం చేయని పక్షంలో రంగం నుంచి తప్పుకోవాలని నా వాళ్ళకు చెప్పాను’ అని ఆయన తెలిపారు. అంత ధైర్యంగా చెప్పగలిగే దమ్ము బాబుకు ఉందా? అని బొత్స నిలదీశారు. ఎన్టీఆర్ ప్రవేశపెట్టిన మద్య నిషేధాన్ని ఎత్తేసిన బాబు ఇప్పుడు దానికి వ్యతిరేకంగా మాట్లాడటం ఆశ్చర్యంగా ఉందని చెప్పారు. మద్యం వ్యాపారులు, సిండికేట్ ఆగడాలను అదుపుచేయటానికి ప్రభుత్వమే దాడులు చేయిస్తోందన్న వాస్తవం టిడిపి అధినేత గ్రహించాలని ఆయన సూచించారు. బాబు సొంతూరు నారావారిపల్లి సారాపల్లెగా మారిపోయిందని ఆయన సొంత తమ్ముడు రామమూర్తినాయుడే స్వయంగా ఆరోపించిన విషయం బొత్స గుర్తుచేశారు. చంద్రబాబు నిరాశ, నిస్పృహలతో కొట్టుమిట్టాడుతున్నాడని ఆయన ధ్వజమెత్తారు. అధికారం కోసం ఆయన ఎంత పరితపించినా ప్రజలు నమ్మే స్థితిలో లేరని విమర్శించారు.కాగా పిఆర్పీలో ఒకే సామాజికవర్గానికి చెందినవారు అధికంగా ఉన్నందున వారికే ఎక్కువ పదవులు లభించటం సహజమని బొత్స వ్యాఖ్యానించారు.

"నా రికార్డును మరో ఇరవై ఏళ్ల వరకూ ఎవరూ బ్రేక్ చేయలేరు''

2012-01-29T09:01:00.002+05:30

'నాకు సీఎం పదవి కొత్త కాదు. దానిపై కోరికా లేదు. రాష్ట్రంలో అత్యధికంగా తొమ్మిదేళ్లు ముఖ్యమంత్రిగా ఉన్నది నేనే. మరో ఎనిమిదేళ్లుగా ప్రతిపక్ష నేతగా ఉంటున్నాను. నా రికార్డును మరో ఇరవై ఏళ్ల వరకూ ఎవరూ బ్రేక్ చేయలేరు'' టీడీపీ అధినేత చూపంతా సీఎం కుర్చీపైనేనన్న విమర్శలను చంద్రబాబు తిప్పికొట్టారు. "ముఖ్యమంత్రి పదవి లేక నాకు అసహనం పెరుగుతోందని కొందరు వ్యాఖ్యానిస్తున్నారు. నాకు అలాంటి అసహనాలేమీ లేవు. గతంలో ఏ సీఎం పట్టించుకోని విద్యుత్ రంగాన్ని సంస్కరణల బాట పట్టించానని చెప్పారు. రాష్ట్రానికి పెట్టుబడుల కోసం ప్రపంచమంతా ఫైళ్లు పట్టుకొని తిరిగాను " హైదరాబాద్‌కు ఐటీ కంపెనీలు ఒక్క రోజులో రాలేదు. వాటిని ఇక్కడకు తేవడానికి గాడిద చాకిరీ చేశాం. పెట్టుబడుల కోసం ఫైళ్ళు పట్టుకొని ప్రపంచం అంతా తిరిగాను. అమెరికాలో ట్రాఫిక్ జాం అయితే అపాయింట్‌మెంట్ మిస్ కారాదని రోడ్డుపై దాదాపుగా పరుగెత్తుకొంటూ వెళ్ళాను.సింగపూర్ వెళ్లినప్పుడు తెల్లవారుజామున లేచి వెళ్ళి, అక్కడ రోడ్లు ఎలా శుభ్రం చేస్తారో చూసి అదే పద్ధతులను ఇక్కడ ప్రవేశపెట్టాను. ఈ విషయంలో నన్ను ఆ దేశ ప్రధాని మెచ్చుకొన్నారు. అప్పటి ప్రధాని వాజ్‌పేయి వెంట పడి మొబైల్ ప్రైవేటీకరణకు ఒప్పించాను. నాలుగు లైన్లు, ఆరు లైన్ల రోడ్లు మనకు ఉండాలని వాదించాను. మాకు లక్ష కోట్ల ఆస్తులు ఉండాలని ఆశపడలేదు. దేశం, రాష్ట్రం బాగుపడాలని, ప్రతివారికి చదువు, ఉపాధి ఉండాలని తపించాను. ఈసారి వచ్చినా వాటి కోసమే పోరాటం. వాటితోపాటు వ్యవసాయం లాభసాటిగా చేయడం, పేదరికం లేని సమాజాన్ని నిర్మించడమే లక్ష్యం' అని ఆయన పేర్కొన్నారు. ఎన్టీఆర్ భవన్‌లో జరిగిన టీడీపీ అనుబంధ తెలుగు సాంకేతిక నిపుణుల విభాగం రాష్ట్ర కార్యవర్గం ప్రమాణ స్వీకారంలో పాల్గొన్న చంద్రబాబు ఈమాటలన్నీ చెప్పారు .

సీఎం పదవిని మూడేళ్ళు సీమాంధ్ర కు రెండేళ్ళు తెలంగాణకి ఇస్తే పోలా !

2012-01-29T06:52:00.001+05:30

ముఖ్యమంత్రి పదవిని మూడేళ్ళ పాటు సీమాంధ్ర ప్రాంత వ్యక్తికి, రెండేళ్ళ పాటు తెలంగాణ వ్యక్తికి కట్టబెట్టాలన్న తన ప్రతిపాదనకు చట్టబద్ధత కల్పించాలని మాజీ మంత్రి జెసి దివాకర్‌రెడ్డి పేర్కొన్నారు . శనివారం జెసి విలేఖరులతో మాట్లాడుతూ తన ప్రతిపాదన చాలా సమంజసమైందని, ఇది అమలు చేస్తే ఎన్నో వివాదాలకు తెర పడుతుందని అన్నారు. సీమాంధ్రకు చెందిన ముఖ్యమంత్రులతో ఇప్పటికే మూడేళ్ళు కావస్తున్నందున ఇక కిరణ్‌కుమార్ రెడ్డిని తొలగించి, తెలంగాణ వ్యక్తికి కట్టబెట్టాలంటారా? అని ప్రశ్నించగా, ఇప్పుడున్న ముఖ్యమంత్రిని తొలగించాలన్నది తన ఉద్దేశం కాదని అన్నారు. ఈ ప్రతిపాదనను అమలు చేయాలంటే కనీసం మూడేళ్ళు పడుతుందని చెప్పారు. దీనికి చట్టబద్ధత కల్పిస్తే ఏ పార్టీ అధికారంలోకి వచ్చినా అమలు చేయాల్సి ఉంటుందని అన్నారు. పెద్ద మనుషుల ఒప్పందం అమలు సాధ్యం కాదు కాబట్టి చట్టబద్ధత కల్పించాలన్నది తన ఉద్దేశమని ఆయన చెప్పారు. రాష్ట్రావతరణ ఏర్పడినప్పటి నుంచి సీమాంధ్ర వ్యక్తులు ముఖ్యమంత్రులుగా ఉన్నప్పుడే తెలంగాణ ఉద్యమం వస్తున్నదని ఆయన తెలిపారు. దీనిని బట్టి ఈ అంశం రాజకీయాలతో ముడిపడి ఉంటోందని స్పష్టమవుతున్నదని అన్నారు. ఈ విషయాన్ని తాను అవసరమైతే తమ పార్టీ అధిష్ఠానం దృష్టికి తీసుకెళతానని ఆయన తెలిపారు.

రామోజీకి సుప్రీంకోర్టులో చుక్కెదురు

2012-01-29T06:08:00.001+05:30

విశాఖపట్నంలోని ఈనాడు కార్యాలయానికి సంబంధించిన భూవివాదం కేసులో ఆ సంస్థ చైర్మన్ చెరుకూరి రామోజీరావుకు సుప్రీంకోర్టులో చుక్కెదురైంది. లీజు గడువు ముగిసినప్పటికీ తమ ఆస్తిని తిరిగి అప్పగించేందుకు నిరాకరించటమేకాక తమకు తెలియకుండా కొంత భూమిని రహదారి విస్తరణకు ఇచ్చి తమని మోసగించారని భూ యజమాని కుమార్‌వర్మ విశాఖ త్రీటౌన్ పోలీసు స్టేషన్‌లో చీటింగ్ కేసు దాఖలు చేసిన విషయం తెల్సిందే . అలాగే లీజును పొడిగించేందుకు ఆయన నిరాకరిస్తున్నారు. అయితే లీజును పొడిగించటంతో పాటు గతంలో తాను దాఖలు చేసిన కౌంటర్‌లో కొన్ని సవరణలు చేయటానికి అనుమతించాల్సిందిగా విజ్ఞప్తి చేస్తూ రామోజీరావు సుప్రీం కోర్టును ఆశ్రయించారు. కేసుకు సంబంధించి కౌంటర్‌లో సవరణలు చేపేట్టేందుకు సుప్రీం కోర్టు అనుమతి నిరాకరించింది. ఇంత జాప్యం జరిగిన తరువాత సవరణలకు అనుమతి ఇవ్వాలని కోరటంలో అర్థం లేదని జస్టిస్ లోదా, జస్టిస్ గోఖ్లేతో కూడిన బెంచి అభిప్రాయపడింది. తనకు జరిగిన అన్యాయాన్ని సాక్ష్యాధారాలతో రుజువు చేసిన పిటిషనర్ కుమార్‌వర్మ ప్రయోజనాలకు విఘాతం కలిగించలేమని న్యాయమూర్తులు స్పష్టం చేశారు. అంతేకాక రామోజీరావుపై బనాయించిన క్రిమినల్ కేసు పరిణామాలను ఎదుర్కోక తప్పదని న్యాయమూర్తులు స్పష్టం చేశారు. ఈనాడు కార్యాలయం ప్రారంభానికి తాను పదకొండువేల చదరపు అడుగుల స్థలం ఇచ్చినట్టు కుమార్‌వర్మ తన పిటిషన్‌లో తెలియచేశారు. అయితే తనకు కుమార్‌వర్మ 9200 చదరపు అడుగులే ఇచ్చారని, మిగిలిన 1800 చదరపు అడుగుల భూమి తనదేనని రామోజీరావు తన కౌంటర్‌లో తెలియచేశారు. రామోజీరావుకు అసలు భూమే లేనప్పుడు 1800 చదరపు అడుగుల భూమి ఎలా వచ్చిందో విచారణ చేయించాలని కుమార్‌వర్మ డిమాండ్ చేశారు. రికార్డులను పరిశీలించిన అధికారులు రామోజీరావుకు ఒక్క అంగుళం భూమిలేదని తేల్చారు. తాను తప్పు లెక్కలు వేశానని ఒప్పుకుంటూ, 11వేల చదరపు అడుగుల భూమిని కుమార్‌వర్మ ఇచ్చారని అంగీకరిస్తూ రామోజీరావు కోర్టుకు అఫిడవిట్‌లో తెలియచేశారు. అయితే రాష్ట్ర హైకోర్టు సహా అన్ని న్యాయస్థానాలూ రామోజీరావు విజ్ఞప్తులను త్రోసిపుచ్చుతూ, ఇచ్చిన తీర్పులను తాము సమర్థిస్తున్నామని జస్టిస్ గోఖలే, జస్టిస్ దత్తు స్పష్టం చేశారు.

తెలుగుదేశం పార్టీని వదలను

2012-01-28T19:14:00.000+05:30

తాను తెలుగుదేశం పార్టీని వదిలివెళ్తున్నట్లు వస్తున్న వార్తల్లో నిజం లేదని ఆ పార్టీ నేత, రాజ్యసభ సభ్యుడు హరికృష్ణ పేర్కొన్నారు. ఇటీవల నందమూరి బాలకృష్ణ రాజకీయాల్లోకి వస్తున్నట్టు ప్రకటించిన దరిమిలా రక రకాల కధనాలు ప్రచారం లో కొచ్చాయి. హరికృష్ణ అయన తనయుడు జూనియర్ ఎన్టీఅర్ పార్టీ కి దూరమౌతున్నారనే వార్తలు ప్రచారం లో కొచ్చాయి.గత ఏడాది మే లో జరిగిన మహానాడు సమావేశాల నుంచి జూనియర్ ఎన్టీఆర్ పార్టీ కి పూర్తిగా దూరం గా వున్నారు.హరికృష్ణ కూడా అంటి ముట్టనట్టే వ్యవహరిస్తున్నారు.ఇదే క్రమంలో బాలకృష్ణ ప్రకటనతో హరి పార్టీ వదులుతున్నారనే ఊహాగానాలు వ్యాప్తిలో కొచ్చాయి.మీడియాతో మాట్లాడుతూ వాటిని హరి ఖండించారు.
టీడీపీని వదిలే ప్రసక్తే లేదని, తన వొంట్లో ఉన్నది ఎన్టీఆర్ రక్తమని, తమ కుమారుడు జూనియర్ ఎన్టీఆర్ కూడా టీడీపీలోనే కొనసాగుతారని హరికృష్ణ స్పష్టం చేశారు. అమలాపురంలో అంబేద్కర్ విగ్రహాల ధ్వంసాన్ని ఆయన ఖండించారు. సుస్తిర పాలన అందించేది ఒక్క టీడీపీయేనని, వచ్చే ఎన్నికట్లో తెలుగుదేశం పార్టీ విజయంసాధిస్తుందని హరికృష్ణ ఆశాభావం వ్యక్తపరిచారు

అమితాబ్ కంటే గొప్ప నటుడ్ని అనుకుంటే అది మూర్ఖత్వమే

2012-01-28T08:35:00.000+05:30

"బిజినెస్ మేన్ " చిత్రం విజయం సాధించిన నేపధ్యం లో హీరో మహేష్ బాబు తన మనసులో మాటలను మీడియా తో పంచుకున్నారు. మీడియా తో అయన ముచ్చటించిన విషయాలు అయన మాటల్లోనే చదవండి .
*డైరెక్టర్ రాంగోపాల్ వర్మ చాలా ఎక్సయిట్ అవుతాడు. ముంబయ్‌లో ‘బిజినెస్‌మేన్’ షూటింగ్ చూసి, చాలా ఎక్సయిట్ అయ్యేవారు. ఫోన్లు చేసి అభినందించేవారు. ఆయన ప్రోత్సాహం మరవలేనిది. ఆయన ఏదో ఎక్సయిట్‌మెంట్‌లో అమితాబ్‌కన్నా గొప్ప నటుడు మహేష్ అన్నారు. అది నిజం అని నేను నమ్మితే అంతకన్నా ఫూలిష్‌నెస్ ఉండదు.
*ఒక హిట్ వచ్చినప్పుడు ఎంత ఆనందపడతానో, ఫ్లాప్ వచ్చినప్పుడు అంతే కుంగిపోతాను. ఇప్పుడు వరుసగా రెండు హిట్లు వచ్చాయి కాబట్టి మిమ్మల్ని కలిసి, మాట్లాడుతున్నాను. అదే ఫ్లాప్ వస్తే.. ఎవరితో మాట్లాడను, కలవను. అంత బాధపడతాను. యాక్చువల్‌గా ఆ సమయంలో 8 నెలలు బ్రేక్ తీసుకోవాలనుకున్నాను. కానీ అది దాదాపు రెండున్నరేళ్లయ్యింది. ఈ గ్యాప్‌లో మానసికంగా నేను చాలా పరిణతి చెందాను. చాలా విషయాలు నేర్చుకున్నాను. అంతకుముందు బాగా కోపం వచ్చేది. ఎవరైనా విమర్శిస్తే.. కోపం వచ్చేసేది. కానీ ఇప్పుడు కూల్‌గా ఉంటున్నాను. ఎదుటివారి మాటలను ఓపికగా వింటున్నాను.

*రెండు సినిమాలు సక్సెస్ అయ్యాయి, అంత మాత్రాన నంబర్ వన్ నేనే అని ఎందుకు ఒప్పుకోవాలి? ఏ సినిమా విజయం ఆ సినిమాకే పరిమితమవుతుంది. సినిమా సినిమాకి నంబర్ మారిపోతుంది. నాకు సంబంధించినంతవరకు నేను ఏ సినిమా చేసినా మొదటి సినిమాగానే భావిస్తాను. నేను ఇంకా చాలా నేర్చుకోవాల్సి ఉంది.

కోడెల ,జగన్‌ పోటాపోటీ దీక్షలు

2012-01-27T09:43:00.000+05:30

రాష్ట్రంలో వస్త్రాలపై విలువ ఆధారిత పన్ను(వ్యాట్)ను తొలగించాలని కోరుతూ వస్త్ర వ్యాపారులు గత నాలుగురోజులుగా రాష్ట్రవ్యాప్తంగా దుకాణాలు మూత వేసి నిరసనలు, ధర్నాలు చేస్తోన్న విషయం తెల్సిందే. ఈ నేపథ్యంలో వస్త్ర వ్యాపారుల న్యాయమైన డిమాండ్లకు మద్దతుగా తెలుగుదేశం సేనియర్ నేత కోడెల శివ ప్రసాద్ రావు ,వైఎస్సార్ కాంగ్రెస్ పార్టీ అధ్యక్షుడు వైఎస్ జగన్‌మోహన్‌రెడ్డి నరసరావు పేట లో శుక్ర వారం పోటాపోటీగా దీక్షలు చేపడుతున్నారు.దీంతో అక్కడ ఉద్రిక్తకర పరిస్తితులు తలెత్త కుండా పోలీసులు భారీ బందోబస్తు ఏర్పాట్లు చేస్తున్నారు.

ఇక షిర్డీసాయిగా నాగ్

2012-01-27T08:27:00.000+05:30

అన్నమయ్య, శ్రీరామదాసు చిత్రాల్లో భక్తుడిగా నటించి, ప్రేక్షకుల మన్ననలు పొందిన ప్రముఖ హీరో నాగార్జున ఇక షిర్డీ సాయి గా దర్శనమివ్వ బోతున్నారు..నాగ్‌ని భక్తుడిగా మలిచిన దర్శకేంద్రుడు కె. రాఘవేంద్రరావు ఆయన్ను సాయిబాబాగా మలుస్తున్నారు. సాయికృప ఎంటర్‌టైన్‌మెంట్స్ పతాకంపై శ్రీమతి సులోచనారెడ్డి సమర్పణలో పారిశ్రామికవేత్త ఎ.మహేష్‌రెడ్డి షిర్డీ సాయి చిత్రాన్ని నిర్మిస్తున్నారు. ఇటీవల చిత్రసంగీత దర్శకుడు ఎం.ఎం. కీరవాణి ఆధ్వర్యంలో పాటలను రికార్డ్ చేశారు. వచ్చే నెల 2న కర్ణాటకలోని ఒక మారుమూల గ్రామంలో ఈ చిత్రం షూటింగ్‌ని ఆరంభించి 25 రోజుల పాటు జరుపనున్నారు. ఇదిలా వుండగా, గురువారం ఈ చిత్రం ‘ఫస్ట్ లుక్’ని విడుదల చేశారు. ఈ సందర్భంగా ఈ చిత్రవిశేషాలను నాగార్జున తెలియజేస్తూ -‘‘అన్నమయ్య, శ్రీరామదాసు చిత్రాల్లో భక్తుడిగా నటించిన నాకు ఈ చిత్రంలో శిరిడి సాయి పాత్ర పోషించే అవకాశం రావడం అదృష్టంగా భావిస్తున్నాను. ఇది నాకు ఓ మరపురాని చిత్రం అవుతుంది. రాఘవేంద్రరావుగారితో చేస్తున్న మరో గొప్ప భక్తిరసాత్మక చిత్రం ఇది. సాయిబాబా భక్తులైన మహేష్‌రెడ్డిగారు ఎంతో అభిరుచితో, భక్తితో ఈ చిత్రాన్ని నిర్మిస్తున్నారు’’ అని చెప్పారు. ఈ చిత్రానికి పరుచూరి బ్రదర్స్ మాటలు సమకూరుస్తున్నారు ,

సిబీఐ జేడీ కి నార్కో పరీక్షలు నిర్వహించాలి

2012-01-27T08:01:00.000+05:30

ఆడిటర్ విజయసాయిరెడ్డికి నార్కో అనాలసిస్ పరీక్షలు జరిపేందుకు అనుమతివ్వాలంటూ కోర్టును సీబీఐ కోరడంపై వైఎస్సార్ కాంగ్రెస్ పార్టీ నాయకురాలు, ఎమ్మెల్యే భూమా శోభానాగిరెడ్డి తీవ్రంగా స్పందించారు. ‘‘అసలు సీబీఐ విచారణ తీరుపైనే అనేక అనుమానాలు తలెత్తుతున్నాయి. కాబట్టి అసలు సీబీఐ అధికారులు, సంస్థ జాయింట్ డెరైక్టర్ లక్ష్మీనారాయణ నిజాయతీగా, చిత్తశుద్ధితో దర్యాప్తు జరుపుతున్నారో, లేక అధికార పార్టీ ఆదేశాల మేరకు వ్యవహరిస్తున్నారో తెలుసుకోవడానికి వారికే నార్కో పరీక్షలు నిర్వహించాలి’’ అన్నారు.గురువారం ఆమెమీడియాతో మాట్లాడారు. సీబీఐ తీరు ఏ మాత్రం నిజాయతీగా లేదని, అది అధికారపార్టీ జేబు సంస్థగా వ్యవహరిస్తోందని ధ్వజమెత్తారు.ఏదోలా వైఎస్సార్ కాంగ్రెస్ పార్టీ అధ్యక్షుడు జగన్‌మోహన్‌రెడ్డిని ఈ కేసుల్లో ఇరికించి, ఆయన్ను రాజకీయంగా దెబ్బ తీసే కుట్రతోనే కాంగ్రెస్, సీబీఐ ముందుకు పోతున్నాయని శోభ ఆరోపించారు. ‘‘రామోజీరావు, టీడీపీ అధ్యక్షుడు చంద్రబాబులదీ అదే ఎజెండా. వైఎస్ తదనంతరం ఇక అధికారం తమదేననుకున్న బాబు, రామోజీలకు.. జగన్‌కు లభిస్తున్న జనాదరణ మింగుడుపడటం లేదు. అందుకే ఆయనను లక్ష్యంగా చేసుకుని దుష్ర్పచారానికి ఒడిగట్టారు. ఎమ్మార్ వ్యవహారంలో సునీల్‌రెడ్డి అరెస్టే ఇందుకు నిదర్శనం. సీబీఐ పూర్తిగా చంద్రబాబు డెరైక్షన్‌లోనే దర్యాప్తు చేస్తోంది. జేబు సంస్థలా వ్యవహరిస్తోంది. ఇవి నా మాటలు కాదు. ఏకంగా పార్లమెంటులోనే జాతీయ పక్షాలన్నీ బయట పెట్టిన వాస్తవాలు. ఎమ్మార్ కుంభకోణంలో థర్డ్ పార్టీ జోక్యానికి అనుమతిచ్చిందే బాబు అయితే, ఆయన్ను వదలి వేసి సీబీఐ మరో దిశలో వెళ్లడాన్ని ఏమనాలి? దుబాయ్‌కి చెందిన ఎమ్మార్‌ను రాష్ట్రానికి పరిచయం చేసింది బాబు, తెచ్చింది కోనేరు ప్రసాద్ అయినప్పుడు.. ఆ కోణంలో సీబీఐ ఎందుకు దర్యాప్తు చేయడం లేదు? బాబు దుబాయ్ వెళ్లినప్పుడల్లా కోనేరు ఇంట్లోనే బస చేసేవారని రాష్ట్రంలో అందరికీ తెలుసు. అయినా సీబీఐ మాత్రం దాన్ని పట్టించుకోవడం లేదు.
వైఎస్ హయాంలో ఎమ్మార్ వ్యవహారంలో ప్రభుత్వ వాటాను మంత్రివర్గ ఉపసంఘం సభ్యుల సిఫార్సు మేరకే తగ్గించారు. మరి ఆ ఉపసంఘం సభ్యులు, అధికారుల్లో ఒక్కరినైనా సీబీఐ విచారించిందా? సునీల్‌రెడ్డిని అదుపులోకి తీసుకున్న కొద్ది గంటల్లోపే, ఆయన దర్యాప్తుకు సహకరించడం లేదు కాబట్టి అరెస్టు చేశామని సీబీఐ చెప్పడం విడ్డూరం. సాక్షి పత్రిక ప్రారంభోత్సవంలో జగన్, ఆయన కుటుంబసభ్యులతో సునీల్ కలిసి ఉన్న ఫొటోలను ప్రచురించిన రామోజీకి.. కోనేరు ప్రసాద్‌తో బాబు కలిసున్న ఒక్క ఫొటో కూడా దొరకలేదా?’’ అంటూ శోభ ప్రశ్నించారు.

నార్కో పరీక్షల్లో నిజాలు వెల్లడవుతాయా??

2012-01-26T09:15:00.001+05:30

వైఎస్సార్ కాంగ్రెస్ పార్టీ అధినేత జగన్ ఆస్తుల కేసులో సరైన సమాచారాన్ని ఇవ్వని విజయసాయిరెడ్డిని నార్కో అనాలసిస్ పరీక్షలకు పంపాలని సి బీ ఐ భావిస్తోంది.ఇందుకు గాను అనుమతి ఇవ్వాల్సిందిగా కోర్టును కోరింది. జగన్ కేసులో సాయిరెడ్డి విచారణ ఎదుర్కొంటున్న విషయం తెలిసిందే. కాగా నార్కో పరీక్షల్లోఅయినా సాయి రెడ్డి నిజాలు చెబుతారా అనేదే సందేహమే.నార్కో పరీక్షల్లో ముద్దాయిలు చెప్పేదంతా నిజమేనా అనే అంశం పై విభిన్న వాదనలు వున్నాయి.అసలు నార్కో పరీక్షలు మనవ హక్కుల ఉల్లంఘన అనే వాదన కూడా వుంది. ఇదిలావుంటే ఇప్పటి వరకు సాయి రెడ్డి ని ప్రశ్నించిన విధానం, ఎన్ని రోజులు విచారణ చేసినదీ, ఆయన జవాబులిచ్చిన తీరు తదితర అంశాల గురించి కోర్టుకు పూసగుచ్చినట్లు సి బీ ఐ వివరించింది. సాయిరెడ్డి తనకు తెలిసిన, కీలకమైన సమాచారాన్ని దాస్తున్నారని తెలిపింది. కేసు పరిశోధనలో భాగంగా మరిన్ని వివరాలు, సమాచారం తప్పనిసరిగా సేకరించాల్సి ఉందని పేర్కొంటూ.. అందుకు నార్కో పరీక్షలే మార్గమని స్పష్టం చేసింది.
సాయిరెడ్డిని బెంగుళూరు లేదా గుజరాత్‌లోని 'ఫోరెన్సిక్ సైన్స్ లేబరేటరీ'లకు తీసుకువెళ్లి, ఆధునిక విధానాల ద్వారా పరీక్షించేందుకు అనుమతించాలని కోరింది. వాదనలు విన్న న్యాయమూర్తి నాగమారుతీశర్మ .. 30న కౌంటర్ దాఖలు చేయాల్సిందిగా డిఫెన్స్ న్యాయవాదులను ఆదేశించారు. అదే రోజుకు కేసును వాయిదా వేశారు. ఈ నార్కో టెస్టుల అంశం జగన్ కేసును మలుపుతిప్పుతుందని భావిస్తున్నారు.
సీబీఐ ఏమి చేబుతోందంటే ??
1) కేసు విచారణలో భాగంగా సాయిరెడ్డిని ప్రశ్నించాం. వారు చేసిన తప్పులకు సంబంధించి, తాము సేకరించిన కీలక ద్రువ పత్రాలను ఆయనకు చూపించాం. వాటి గురించి ఆయన సరైన సమాధానం చెప్పలేదు. కొన్ని ఎంపిక చేసుకున్న సమాధానాలను మాత్రమే చె ప్పారు. మిగతా వాటి గురించిన నిజాలు తెలుసుకోవాలి.
2) జగతి సంస్థకు నిధులు రప్పించడానికి ఆయన ఉపయోగించిన 'టెక్నిక్' (విధానం) గురించిన వివరాలు రాబట్టకపోతే ఈ కుంభకోణం ఎలా జరిగిందో తెలియకుండా పోతుంది. వాస్తవాలు మరుగునపడతాయి. నేరం ఎలా జరిగిందన్నది ఆయనకు మాత్రమే తెలుసు. కానీ వాటిని వెల్లడించడం లేదు.
3) కేసును పారదర్శకంగా పరిశోధించేందుకు శా స్త్రీయ పద్ధతుల్లో సాయిరెడ్డిని విచారణ చేయాలి. నిజాలు రాబట్టాలి. నేరం జరిగిన విధానం వెలుగులోకి రావాలంటే నార్కో పరీక్షలు చేయాల్సిన అవసరం ఉంది. అక్రమంగా సంపాదించిన ఆస్తులను, అందుకు సహకరించిన వారి వివరాలను వెలికితీయాల్సి ఉంది.
4) పక్కా ప్రణాళికతో కొన్ని సంవత్సరాలుగా సాయిరెడ్డి ఈ కుట్రలో పాలుపంచుకున్నారని మా పరిశోధనలో ఇది తేలింది. ఆయన నుంచి చాలా సమాచారం రావాల్సివుంది.
5) విచారణలో సాయిరెడ్డి కీలకమైన ప్రశ్నలకు కూడా సరైన జవాబులు చెప్పలేదు. చాలా సమాధానాలు దాటవేశారు. అందుకే నార్కో పరీక్షలకు అనుమతి కోరుతున్నాం. ఇవి చేయించడం సాక్ష్యాధారాల చట్టం -1872, సెక్షన్ 27కు, ఆర్టికల్ 20(3)కు విరుద్ధం కాదు అని సి బీ ఐ కోర్టు కి తెలియ చేసింది.

సునీల్‌రెడ్డికి రిమాండ్

2012-01-25T18:44:00.001+05:30

ఎమ్మార్ కేసులో అరెస్ట్ అయిన సునీల్‌రెడ్డికి బుధవారం నాంపల్లి సీబీఐ ప్రత్యేక కోర్టు ఫిబ్రవరి 1వ తేదీ వరకు రిమాండ్ విధించింది. సునీల్‌రెడ్డి 15 రోజులపాటు తమ కస్టడీకి అనుమతించాలని సీబీఐ వేసిన పిటిషన్‌పై విచారణను ఈనెల 27వ తేదీకి వాయిదా వేసింది. దీంతో సునీల్ రెడ్డిని చంచల్‌గూడ జైలుకు తరలించారు. కాగా మంగళవారం తెల్లవారుజామున సునీల్ రెడ్డిని అదుపులోకి తీసుకున్న పోలీసులు ఆ సాయంత్రం అరెస్టు చేసినట్లు ప్రకటించిన విషయం తెల్సిందే.దీనిపై సునీల్‌రెడ్డి తరఫు న్యాయవాది అశోక్‌రెడ్డి అబ్యంతరం వ్యక్తం చేస్తూ సరైన ఆధారాలు చూపకుండా అరెస్టుచేశారని, అలాగే కస్టడీకి అప్పగించాలన్న సీబీఐ కోరిక ఆక్షేపణీయమని ఆయన వాదించారు. దీనిపై ఏవైనా వాదనలు వినిపించాలనుకుంటే కౌంటర్‌ దాఖలు చేయాలని సీబీఐ ప్రత్యేక కోర్టు న్యాయమూర్తి నాగమారుతి శర్మ అశోక్‌ రెడ్డికి సూచించారు. ఎమ్మార్ కేసులో కోనేరు ప్రసాద్, కోనేరు రంగా రావు, సునీల్ రెడ్డిలదే కీలక పాత్ర అని సిబిఐ రిమాండ్ రిపోర్టులో తెలిపింది. విల్లాల యజమానుల నుండి డబ్బులు వసూలు చేసింది రంగారావు, సునీల్ రెడ్డిలే అని పేర్కొంది. విల్లాల డబ్బు ఎక్కడికి చేరిందో సునీల్ రెడ్డికే తెలుసునని సీబీఐ చెప్పింది.
మరోవైపు జగన్ కేసులోనే అరెస్టైన జగతి పబ్లికేషన్ వైస్ చైర్మన్ విజయ సాయి రెడ్డికి నార్కో టెస్ట్‌కు అనుమతివ్వాలని సిబిఐ అధికారులు కోర్టులో పిటిషన్ దాఖలు చేశారు. గతంలో రిమాండులోకి తీసుకొని విచారిస్తున్నప్పటికీ పూర్తి స్థాయిలో సమాధానాలు రాబట్టలేకపోయినందున నార్కో టెస్టుకు అనుమతించాలని కోరారు. ఈ పిటిషన్‌ను కోర్టు 30వ తేదీకి వాయిదా వేసింది.

లగడపాటి ఒళ్లు దగ్గర పెట్టుకో

2012-01-25T18:32:00.000+05:30

సినీ హీరో నందమూరి బాలకృష్ణ నుద్దేశించి కాంగ్రెస్ ఎంపీ లగడపాటి చేసిన వ్యాఖ్యలపై టీడీపీ నేతలు కొడాలి నాని, వంశీ లు మండి పడ్డారు . బాలకృష్ణను విమర్శించే నైతికత లగడపాటికి లేదని కొడాలి నాని అన్నారు. లగడపాటి ఒళ్లు దగ్గర పెట్టుకుని మాట్లాడాలని ఆయన హెచ్చరించారు. భవిష్యతులో ఇలాంటి విమర్శలు చేస్తే లగడపాటిని కృష్ణా జిల్లాలో తిరగనివ్వమని నాని అన్నారు. విజయవాడ సమస్యలను గాలికి వదిలేసి పెయిడ్ ఆర్టికల్స్ వేయించుకునే లగడపాటికి బాలకృష్ణను విమర్శించే హక్కులేదని వల్లభనేని వంశీ అన్నారు. కాగా మంగళ వారం లగడపాటి ' బాలకృష్ణ పై విమర్శలు కురిపించారు 'నా సత్తా అంత, బలం ఇంత అంటూ ప్రకటనలు చేయటం కాదు. రంగంలో దిగు. ముందుగా ఏడు స్థానాలకు ఉప ఎన్నికల్లో పోటీకి సిద్ధపడు. అప్పుడు తెలుస్తుంది నీ స్థానం ఎక్కడుంటుందో... లేదం టే మరో 17 నియోజకవర్గాల్లో ఉప ఎన్నికలొస్తాయి. వాటిలోనైనా తలపడు. ఇవేవీ కాదంటే... చిరంజీవి ప్రాతినిధ్యం వహిస్తున్న తిరుపతినుంచి పోటీ చేస్తావా.. ఆయనతో మాట్లాడి రాజీనామా చేయి స్తా. అక్కడ ఓ సామాన్య కాంగ్రెస్ నాయకుడిపై గెలిచి చూపించు.'' అని రాజగోపాల్ సవాల్ విసిరారు.ఇందుకు నానీ,వంశీలు స్పందించారు.

అమితాబ్ కంటే మహేష్ గొప్పనటుడు

2012-01-24T13:09:00.002+05:30

అమితాబ్ బచ్చన్ కంటే మహేష్ బాబు గొప్ప నటుడని, దేశంలో మహేష్ వంటి గొప్ప నటుడు మరొకరు లేరని దర్శకుడు రాంగోపాల్‌వర్మ వ్యాఖ్యానించారు. మహేష్ బాబు హీరోగా నటించిన 'బిజినెస్ మేన్' ఆడియో హెక్సా ప్లాటినమ్ డిస్క్ కార్యక్రమంలో వర్మ మాట్లాడారు."నిజాయతీగా చెబుతున్నా.. తెలుగులోనే కాదు మొత్తం దేశంలోనే మహేష్ బాబు అంతటి ప్రతిభావంతుడైన నటుడు లేడు. డైరెక్టర్‌గా నాకున్న అనుభవంతో ఆ మాట చెప్పగలను'' అమితాబ్ కంటే మహేష్ వందశాతం మంచి నటుడనేది తన అభిప్రాయమని, 'బిజినెస్‌మేన్'లో మహేష్ నటనను అమితాబ్ కూడా చేయలేరని అన్నారు. 'బిజినెస్‌మేన్‌ని మీరు బాలీవుడ్‌లో తీస్తారా?'అని ప్రశ్నించగా.. "ఇది పూర్తిగా జగన్ దృక్కోణం నుంచి వచ్చిన సినిమా , నేను వేలుపెడితే చెడిపోతుంది'' అన్నారు.మాఫియాని పాజిటివ్‌గా చూపించడాన్ని సమర్థిస్తారా అనే ప్రశ్నకు "మనకున్న నాయకులందరూ ఏ మాఫియా డాన్‌కంటే తక్కువ?'' అని ఎదురు ప్రశ్నించారు. అయితే.. సాధారణంగా దర్శకుల గొప్పతనం గురించే చెప్పే దర్శకరత్న దాసరి నారాయణరావు ఈ కార్యక్రమంలో కొంతమంది దర్శకుల్ని 'అసమర్థులు'గా విమర్శించారు. "తెలుగు తెరమీద ఇలాంటి హీరో ఉన్నాడా? అని అనిపించేంత గొప్పగా నటించాడు'' అంటూ మహేష్ ని ప్రశంసించారు.
మొత్తం మీద అందరు కలసి మహేష్ ని మునగ చెట్టు ఎక్కిస్తున్నారు ! బాబూ జాగ్రత్త అని మహేష్ సన్నిహితులు అంటున్నారు.

బాలయ్య ఏదేదో మాట్లాడతాడు

2012-01-24T11:58:00.000+05:30

సినీ నటుడు బాలకృష్ణ చిరు పై మాటల తూటాలు పేలుస్తుంటే కాంగ్రెస్ నేత చిరంజీవి మాత్రం వాటిని సీరియస్ గా తీసుకోవడం లేదు. ఒక్కొక్క సందర్భంలో ఒక్కొక్కరిని ఉద్దేశించి బాలకృష్ణ ఏమేమో మాట్లాడేస్తారని చిరంజీవి ఎద్దేవా చేశారు. ప్రజాస్వామ్యం లో ఎవరు ఎక్కడి నుంచైనా పోటీ చేయవచ్చని, బాలకృష్ణ తనపై పోటీ చేస్తాననడంలో తప్పేముందని వ్యాఖ్యానించారు. తిరుపతి పర్యటనకు వచ్చిన చిరంజీవి విలేకరులతో మాట్లాడారు. చంద్రబాబు, బాలకృష్ణ చేస్తున్న విమర్శల గురించి విలేకరులు ప్రస్తావించారు.బాలకృష్ణ వ్యాఖ్యలను తేలిగ్గా తీసుకున్న చిరంజీవి.. చంద్రబాబుపై మాత్రం ఎదురు దాడికి దిగారు. బాలకృష్ణ ఆరోపణలపై 'నో కామెంట్' అంటూ నవ్వు తూ కొట్టిపారేసిన చిరంజీవి... బీసీలకు ఇచ్చిన మాటను బాబు తప్పారని, సామాజిక న్యాయం గురించి మాట్లాడే అర్హత తనకు మాత్రమే ఉందని చెప్పారు. సామాజిక న్యా యం పేరుతో తన సామాజిక వర్గానికి చెందిన వారికే మంత్రి పదవులు ఇప్పించుకున్నారన్న టీడీపీ విమర్శలకు ఆయన బదులిస్తూ.. "ఇద్దరు పీఆర్పీ నాయకులకు మం త్రి పదవులు ఇవ్వగానే సామాజిక న్యాయం పోయిందా?నేను రాజకీయాల్లోకి వచ్చిన తర్వాతే చంద్రబాబు సా మాజిక న్యాయం గురించి ఆలోచిస్తున్నారు. అంతకుముందు ఎప్పుడైనా ఆలోచించారా? 2009 ఎన్నికల్లో బీసీలకు 33 శాతం టికెట్లు ఇస్తామని వరంగల్ బీసీ గర్జనలో బాబు ప్రకటించారు. కానీ, 60 మందికి కూడా ఇవ్వలేదు. నేను 104 మంది బీసీలకు టికెట్లు ఇచ్చాను. జనరల్ స్థానాల్లో ఆరుగురు ఎస్సీ, ఎస్టీలకు టికెట్లిచ్చా ను. మైనారిటీలకు 18 అసెంబ్లీ, 6 పార్లమెంట్ టికెట్లు ఇచ్చాను. కాబట్టి సామాజిక న్యాయం గురించి మాట్లాడే అర్హత నాకు మాత్రమే ఉంది. గత రెండు రాజ్యసభ ఎన్నికల్లో రామచంద్రయ్యకు టికెట్ ఇచ్చి బీసీ వర్గాలకు ఇచ్చినట్టు చంద్రబాబు ప్రకటించుకున్నారు.
నేను మంత్రి పదవి ఇప్పించే సరికి ఆయన ఓసీ అయిపోయాడా? నేను కాంగ్రెస్‌లో చేరడంతో చంద్రబాబులో అభద్రతా భావం పెరిగింది. కాంగ్రెస్, పీఆర్పీలు కలిసి మహాశక్తిగా ఆవిర్భవిస్తాయనే ఆందోళనతో ఇష్టమొచ్చినట్టు మాట్లాడుతున్నారు. ఇవి ఆందోళనతో మాట్లాడుతున్న మాటలు తప్ప బాధ్యతతో మాట్లాడుతున్నవి కావు'' అని వ్యాఖ్యానించారు. కాంగ్రెస్‌లో ఎలాంటి విభేదాలు లేవని, బొత్స, కిరణ్, తాను చాలా సఖ్యతతో ఉన్నామని చెప్పారు. అనంతరం తిరుపతి ఎంఆర్ పల్లెలో జరిగిన రెవెన్యూ సదస్సులో చిరంజీవి పాల్గొని మాట్లాడారు.

పార్టీలను అమ్ముకునే నేతలు ఎన్టీఆర్ కాలి గోటికి కూడా సరిపోరు

2012-01-24T09:39:00.002+05:30

"కోట్ల రూపాయలకు పార్టీలను అమ్ముకునే నేతలు ఎన్టీఆర్ కాలి గోటికి కూడా సరిపోరు'' అంటూ కాంగ్రెస్ నేత చిరంజీవిపై సినీ నటుడు నందమూరి బాలకృష్ణ విరుచుకుపడ్డారు. విశాఖ నగరంలోని పెదవాల్తేర్ జంక్షన్‌లో ఎన్టీఆర్ విగ్రహాన్ని ఆవిష్కరించి పాలాభిషేకం చేసిన అనంతరం అయన మాట్లాడారు.
ఎక్కడా చిరంజీవి పేరును ప్రస్తావించకుండానే ఆయనపై దుమ్మెత్తిపోశారు. పార్టీని అమ్ముకునేవారు కూడా మాట్లాడుతున్నారంటూ ఎద్దేవా చేశారు. సీఎం అంటే తెలియని వారంతా ఆ పదవికి పోటీ పడుతున్నారని, అటువంటి వారికి ఎన్టీఆర్‌తో పోలికా? అని మండిపడ్డారు. నిన్న ఎవడో అన్నాడు బాలుడినని. బాలకృష్ణ రెండోవైపు తెలియదు.. బాలుడిని కాబట్టే నిస్వార్థంగా మీ ముందుకు వచ్చానని, టీడీపీ అమలు చేసిన పథకాలు, పనుల గురించి తొడగొట్టి చెబుతున్నానని అన్నారు. ఎన్టీఆర్ సీఎంగా ఉన్నప్పుడు రూపాయి జీతం తీసుకున్నారని, సొంత బంగ్లాలో ఉండి సొంత కారులోనే వెళ్లేవారని గుర్తు చేశారు. ఇంటికొచ్చే వారికి సొంత డబ్బుతోనే మర్యాద చేసేవారని తెలిపారు.
కానీ, ఇప్పుడు కొంతమంది సీఎం అయిపోదామని అనుకుంటున్నారని, సీఎం పదవే జీవితాశయమని భావిస్తున్నారని ఎద్దేవా చేశారు. నటన, రాజకీయం రెండింటిలోనూఎన్టీఆర్‌కు సాటి మరెవరూ లేరని చెప్పారు. రాష్ట్రంలో ప్రస్తుతం విగ్రహాల రాజకీయం నడుస్తోందని బాలకృష్ణ వ్యాఖ్యానించారు. నిస్వార్థంగా ప్రజల కోసం పని చేసిన మహనీయుల విగ్రహాలు పెడితే ఫర్వాలేదు గానీ, ప్రజా సంపదను కుటుంబానికి దోచిపెట్టిన వారికి విగ్రహాలు పెడుతున్నారన్నారు.

బాలయ్యా.. చేతనైతే బావ ముందు తొడగొట్టి మీసం తిప్పు

2012-01-24T09:17:00.000+05:30

‘‘ఎన్టీఆర్‌పై చెప్పులు వేయించిన చంద్రబాబు వంటి దుర్మార్గునికి మద్దతిస్తావా? అంటూ సినీ నటుడు నందమూరి బాలకృష్ణపై దివంగత ఎన్టీఆర్ సతీమణి లక్ష్మీపార్వతి మండిపడ్డారు. తెలుగుజాతి పౌరుషాన్ని ఢిల్లీలో చాటిచెప్పిన మహానుభావుడు ఎన్టీఆరైతే.. అవినీతి కేసులు, సీబీఐ దర్యాప్తు నుంచి తప్పించుకునేందుకు ఢిల్లీ కాళ్లు పట్టుకున్న నయవంచకుడు బాబు. అవినీతికి మారుపేరైన వ్యక్తిని అందలమెక్కించాలంటావా? నీ తండ్రి చావుకు కారణమైన బాబుకు మద్దతివ్వాలా? నీకు రోషం, పౌరుషం లేవా? నువ్వు ఎన్టీఆర్‌కు పుట్టిన కొడుకువేనా? ’’ అంటూ లక్ష్మి పార్వతి ధ్వజమెత్తారు. సోమవారం ఆమె విలేకరులతో మాట్లాడారు. ‘‘బాలయ్యా.. ప్రజల్లో తొడలు కొట్టడం కాదు. నీ బావ చంద్రబాబు ముందు తొడగొట్టి మీసం తిప్పు. నీ తండ్రి చావుకు కారణమైన దుర్మార్గుడు బాబేనంటూ నిలదీస్తే తెలుగు ప్రజలు మెచ్చుకుంటారు. ఎన్టీఆర్‌కు వెన్నుపోటు పొడిచి వేలకోట్ల ఆస్తులు ఎలా కూడబెట్టావని బాబును ప్రశ్నించు. అప్పుడే నువ్వు నిజమైన హీరో అవుతావు’’ అని పేర్కొన్నారు. ‘పూటకొక మాట, వేషంతో బాబు బఫూన్‌లా మారారు. రైతులు, అణగారిన వర్గాలు ఆయన్ను ఈ జన్మలో నమ్మరు. అందుకు బాబు ప్రజలకు ముఖం చూపించలేక నందమూరి వంశాన్ని కరివేపాకులా ఉపయోగించుకుంటున్నారు. అందులో భాగంగానే 2009 ఎన్నికల్లో జూనియర్ ఎన్టీఆర్‌ను వాడుకున్నారు. అవసరం తీరాక పక్కన పెట్టేశారు. ఇప్పుడు ఆయనకు సినిమా అవకాశాలు కూడా దక్కకుండా చేసి, కెరీర్‌ను పాడు చేస్తున్నారు. గతంలో హరికృష్ణ, దగ్గుబాటి వెంకటేశ్వరరావులను కూడా ఇలాగే వాడుకున్నారు. పదవి కోసం సొంత మనుషులను తాకట్టు పెట్టే నీచ సంస్కృతి బాబుది. పదవీ వ్యామోహంతో, బాలయ్యను తన వైపు తిప్పుకునేందుకే కొడుకు లోకేశ్‌కు ఆయన కూతురితో పెళ్లి చేశారు’’ అంటూ ఆమె దుయ్యబట్టారు. సొంత తమ్ముడు రామ్మూర్తి నాయుడిని కూడా బాబు కోలుకోలేని దెబ్బతీశారన్నారు. ‘‘దివంగత ముఖ్యమంత్రి వైఎస్ రాజశేఖరరెడ్డి దయ చూపకపోతే బాలయ్య జైల్లో ఊచలు లెక్కపెట్టేవారు. జీవితాంతం ఖైదీగా ఉండేవారు. బెల్లంకొండ సురేశ్‌పై హత్యాయత్నం చేసిన కేసులో వైఎస్ జోక్యం చేసుకోకుంటే నీవెక్కడుండే వాడివి బాలయ్యా? జీవితాన్ని ప్రసాదించిన వ్యక్తులను విమర్శించడానికి నోరెలా వచ్చింది? వైఎస్‌ను విమర్శిస్తే పుట్టగతులుండవు’’ అని లక్ష్మీపార్వతి దుయ్యట్టారు. వైఎస్ స్థానంలో బాబు ఉండుంటే బాలయ్యను కటకటాలపాలు చేసి, అడ్డు తొలగించుకునేవారన్నారు.

బాలకృష్ణ మాటలన్నీ ఉత్తర ప్రగల్భాలే !

2012-01-24T06:52:00.001+05:30

సినీనటుడు బాలకృష్ణ మాటలన్నీ ఉత్తర ప్రగల్భాలేనని పిఆర్‌పి ఎమ్మెల్యేలు వెల్లపల్లి శ్రీనివాస్, కాటసాని రామిరెడ్డి ఎద్దేవా చేసారు. బాలకృష్ణ మాట్లాడుతోంది అయన సొంత డైలాగులు కాదని, ఆయన చేత చంద్రబాబు మాట్లాడిస్తున్నాడని వారన్నారు. . విజయవాడ, విశాఖపట్న పర్యటనలో బాలకృష్ణ మాట్లాడుతూ రాష్ట్రంలో ఎక్కడైనా ఎమ్మెల్యేగా పోటీ చేస్తానని చెబుతుంటే ఆ పార్టీలోని వ్యక్తులే పార్లమెంట్‌కు పోటీ చేస్తాడని ప్రకటనలు చేస్తున్నారని వీటిలో ఏది నిజమో బాలకృష్ణ ముందు తేల్చుకోవాలని వారు సూచించారు .బాలకృష్ణకు దైర్యం ఉంటే వచ్చే ఉప ఎన్నికల్లో పోటీ చేసి గెలవాలని చాలెంజి చేశారు. మామను వెన్నుపోటు పొడిచిన చంద్రబాబుకు బాలకృష్ణ ఒక లెక్కా అన్నారు . చంద్రబాబు నీడలో ఏ నాయకుడు ఎదగలేడని ఆ విషయం బాలకృష్ణ ఎంత త్వరగా తెల్సుకుంటే అంత మంచిదన్నారు. తండ్రిని దించడానికి వైస్‌రాయ్ హాటల్లో ఎమ్మెల్యేలను తరలించినప్పుడు బాలకృష్ణ ఎందుకు స్పందించలేదన్నారు. ఆర్థిక లావాదేవీల కోసం రివాల్వర్లతో వ్యక్తులపై కాల్చడం బాలకృష్ణ నైజమన్నారు. చంద్రబాబు అవకాశవాద రాజకీయాల్లో బాలకృష్ణను తురుపు ముక్కగా వాడుకొని వదిలేస్తాడని వారు అన్నారు.

చిరంజీవిపై పోటి చేయడానికి సిద్ధం -------బాలకృష్ణ

2012-01-22T17:39:00.001+05:30

తెలుగుదేశం పార్టీ ఆదేశిస్తే .. చిరంజీవిపై పోటి చేయడానికి సిద్ధమని నందమూరి బాలకృష్ణ అన్నారు .వచ్చే ఎన్నికలలో ప్రత్యక్ష రాజకీయాల్లోకి వస్తానని, సినిమాల్లో ఆదరించినట్లే ప్రజలు రాజకీయాల్లో కూడా ఆదరించాలని బాలకృష్ణ కోరారు. పార్టీని మరింత బలోపేతం చేయడానికి కృషి చేస్తానని ఆయన అన్నారు. ఉత్తరాంధ్రలో పర్యటిస్తున్న బాలకృష్ణ పాడేరులో స్వర్గీయ ఎన్టీఆర్ విగ్రహాన్ని ఆవిష్కరించారు. సంక్షేమ పథకాలన్నింటికి ఆద్యుడు ఎన్టీఆర్ అని బాలకృష్ణ పేర్కొన్నారు. బాక్సైట్ తవ్వకాలతో గిరిజనుల సంస్కృతి నాశనమవోతుందని ఆందోళన వ్యక్తం చేశారు. బాక్సైట్ తవ్వకాలకు ప్రభుత్వం ఇచ్చిన హామీలన్నీ వెంటనే రద్దు చేయాలని బాలకృష్ణ డిమాండ్ చేశారు. మద్యం సిండికేట్లతో సామాన్యులు చితికి పోతున్నారని బాలయ్య ఆగ్రహం వ్యక్తం చేశారు.ఉత్తరాంధ్రలో తెలుగుదేశం పార్టీకి అత్యంత ప్రజాధరణ ఉందని, వచ్చే ఎన్నికల్లో ప్రజలు టిడిపికి పట్టం కట్టడం ఖాయమన్నారు. కాగా బాలయ్య రాక సందర్భంగా విశాఖలో, పార్టీలో క్యాడర్‌లో సందడి నెలకొంది.